سووریا: هیچ پێشکەوتنێک بۆ ڕێککەوتن لەگەڵ هەسەدە نییە

بەرپرسێکی وەزارەتی دەرەوەی سووریا ڕایگەیاند: ئەو کۆبوونەوەیەی بڕیارە لە نێوان هەسەدە و حکوومەتی سووریا لە پاریس بکرێت، بە ئامانجی ڕێککەوتنە بۆ تێکەڵکردنەوەی هێزەکانی سووریای دیموکرات بە حکوومەتی سووریا.
قەتیبە ئیدلبی، بەرپرسی کاروباری ئەمەریکا لە وەزارەتی دەرەوەی سووریا ڕایگەیاند: هیچ پێشکەوتنێک لە ڕێککەوتنی نێوان هەسەدە و حکوومەتی سووریا بەدی نەهاتووە، سەرباری ڕێککەوتنی 10ـی ئازاری ڕابردوو.
قەتیبە ئیدلبی بۆ کەناڵی هەواڵی سووریا ڕایگەیاند: هێزەکانی سووریای دیموکرات دەستی بەسەر سەرچاوەکانی سروشتی پارێزگای دێرەزوور گرتووە لە ڕۆژئاهەڵاتی وڵاتەکەدا.
ئاماژە بەوەش دەکات، ئەمەریکا تێگەیشتنێکی باشی هەیە لەگەڵ حکوومەتی سووریا بۆ چارەکردنی کۆمەڵێک دۆسییە، دەشڵێت: کۆبوونەوەی نێوان هێزەکانی سووریای دیموکرات و حکوومەتی سووریا کە بڕیارە لە پاریس ڕێک بخرێت، لەچوارچێوەی ئەو ڕێککەوتنەدایە کە بۆ تێکەڵکردنەوەی هەسەدە بە سووپای سووریا کراوە.
ئیدلبی ڕایگەیاند: ئەمەریکا و فەرەنسا باوەڕیان بە گرنگیی پاراستنی یەکپارچەیی خاکی سووریا هەیە، دەشڵێت: فەرەنسا فشار لە هێزەکانی سووریای دیموکرات دەکات بۆ ئەوەی بە داواکارییەکانی سووریا ڕازی بێت.
لە 10ی ئازاردا، ئەحمەد ئەلشەرع، سەرۆکی سووریا و مەزڵوم عەبدی، فەرماندەی هێزەکانی سووریای دیموکرات، ڕێککەوتنێکیان واژوو کرد بۆ یەکخستنی دامەزراوە مەدەنی و سەربازییەکانی باکووری ڕۆژهەڵاتی سووریا بە حکوومەتی نوێی سووریا، لەوانەش دەروازە سنوورییەکان، فڕۆکەخانە و کێڵگەکانی نەوت و گاز، هەروەها ڕێککەوتنەکە یەکپارچەیی خاکی سووریای دووپات کردەوە و دابەشکردنیشی ڕەتکردەوە، لەو کاتەوە چەندین دانیشتنی دانوستاندن بەڕێوەچووە، بەڵام هیچ پێشکەوتنێک لەم بارەوە نەهاتووەتە دی.