ناوچەكە خۆی بۆ شەر ئامادە دەکات

راپۆرتەكانی هەواڵ ئاماژە بۆ نزیكبوونەوەی شەڕێكی نوێی نێوان ئیسرائیل و ئێران دەكەن، رۆژنامەیەكی ئیسرائیلی پێی وایە هەردوو وڵات بە ئاراستەیەك هەنگاو دەنێن كۆتاییەكەی رووبەڕووبوونەوەی سەربازییە، ئەوەش لەسەر ئەو بنەمایەی گەڕی یەكەمی شەڕەكەیان لە حوزەیرانی رابردوو كۆتایی پرسە ناكۆكەكانی ئەوانی نەهێناوە.

ئێستە شەڕەقسەیەكی هاوشێوەی بەر لە یەكەم گەڕی شەڕی نێوان ئیسرائیل و ئێران هەیە، بەرپرسانی ئێران جیا لەوەی لە میدیاكان سووربوونیان لەسەر پیتاندنی یۆرانیۆم دووپات دەكەنەوە و بێباكی لە سەپاندنی سزاكان پێشان دەدەن، ئەوان هاوكارییەكی بەهێزی سەربازییان لەگەڵ رووسیا و چین و كۆریای باكور لەبارەی بەرنامەی ئەتۆمی و مووشەكی و سیستمی بەرگریی ئاسمانی و فڕۆكەی جەنگی دەست پێ كردووە، ئەوانەش وا دەكەن گەڕێكی تری كتوپڕ و خێرای شەڕ بێتە پێشەوە.

رۆژنامەی "ئیسرائیل هیوم"ی ئیسرائیلی دەڵێت، تەلئەبیب و تاران لەسەر هێڵی بەریەككەوتنێكی نوێ هەنگاو دەنێن، هەوڵ و چارەسەرییە دیپلۆماسییەكان گەیشتوونەتە رێگەیەكی داخراو و بنبەست، بۆیە ناوچەكە خۆی بۆ گەڕێكی تری تەندوتیژی ئامادە دەكات، كە لەوەی پێشوو بەهێزترە، چونكە خۆراگریی رژێمی ئێران و زووچاكبوونەوەی و گۆڕینی فەرماندە كوژراوەكان بەخێرایی، هەموویان پەیامن بەوەی تاران توانای رووبەڕووبوونەوەی ماوە.  

ئێستە تاران خەریكی نوێكردنەوەی توانا مووشەكییەكانیەتی و رۆژانە تاقیكردنەوە ئەنجام دەدات، ئاماژە بۆ هێرشێكی پێشوەختە بۆ سەر ئیسرائیل دەكات، لەبەرانبەردا ئیسرائیل خۆی بۆ بژارەی كراوە ئامادە دەكات، بەتایبەتی لە سایەی سەرقاڵیی واشنتن بە دۆسیە ئاڵۆزەكانی دنیا، بۆیە مەترسییەكە تەنیا هەڵگیرسانی شەڕێكی تر نەماوە و ترس لەوەیە ببێتە شەڕێكی فرەوان و درێژخایەن