ئەندامێكی پەرلەمانی ئێران مەترسییەكی گەورە ئاشكرا دەكات و رایدەگەیەنێت كە ئیسرائیل دەستی بەسەر سەرجەم تۆڕە كۆمەڵایەتییەكان و تەنانەت كامێرە چاودێرییەكانی سەر شەقامەكانيش لە ناوخۆی ئێراندا گرتووە و لە رێگەیەوە چركە بە چركە چاودێری هاموشۆی بەرپرسان دەكات.
مەحموود نبوویان جێگری لیژنەی ئاسایشیی نیشتمانی و سیاسەتی دەرەوە لە پەرلەمانی ئێران قسەی بۆ میدیایەكی وڵاتەكەی كردووە و گوتوویەتی: هەر شتێك بە ئینتەرنێت بەسترابێتەوە لەلایەن تەلئەڤیڤەوە كۆنتڕۆڵكراوە و دەستی بەسەردا گیراوە.
هەروەها گوتوویەتی: هیچ جیاوازییەك لەنێوان تۆڕە كۆمەڵایەتی و ئەپە ناوخۆیی و جیهانییەكاندا نییە، بۆ نموونە واتسئاپ بێت یاخود تۆڕی كۆمەڵایەتی تایبەتی ئێرانی (ئیتا)، ئیسرائیل زۆر بە ئاسانی دەستی بە هەموویان دەگات.
دیسان گوتوویەتی: بە كورتییەكەی ئیسرائیل هەموو زانیارییەكانی بەرپرسانی ئێران دەزانێت و لەژێر دەستی دایە.
ئەندامەكەی پەرلەمانی ئێران ئاماژەی بەوەشداوە: بابەتەكە تەنیا پەیوەندی بە تۆڕەكانی كۆمەڵایەتی و پەیوەندیكردنەوە نییە، بەڵكو كامێرەی چاودێری سەر شەقامەكانیش لەژێر دەستی ئیسرائیلدایە و ئۆتۆمبێلی بەرپرسان چاودێری دەكرێت، بۆ نموونە دەزانن مەسعوود پزیشكیان و محەمەد باقر قالیباف بەرەو كوێ دەچن و كۆبوونەوەكانیان لە كوێن.
جەختیشی كردەوە كە هەموو جوولەیەك لە ناوخۆی ئێران زۆر بە وردی چاودێری دەكرێت جا لە رێگەی ئینتەرنێت یاخود ژیانی گشتی بێت.
وەڵام بدەوه