هۆشداری بەپەلە بۆ هاوڵاتیانی ئێران نێردرا

ئەمڕۆ دووشەممە زۆرێك لە هاووڵاتییان لە سەرتاسەری ئێران لە ڕێگەی مۆبایلەوە پەیامی گوماناوییان لەلایەن هەژماری نەناسراوەوە پێ گەیشتووە كە بووەتە هۆی دروستبوونی نیگەرانی بەتایبەت كە ماوەیەكە باس لە هێرشی چاوەڕوانكراوی ئەمریكا بۆ سەر ئێران دەكرێت.
میدیای فەرمی ئێران بڵاوی كردۆتەوە، پەیامەكە لەلایەن هەژمارێكی نەناسراوەوە بۆ ژمارەیەكی زۆری هاووڵاتییان نێردراوە و تێیدا نووسراوە "سەرۆكی ئەمریكا پیاوێكی كردارییە، چاوەڕوان بن و بزانن چی روودەدات".
ناردنی ئەم پەیامە بووەتە جێگەی دڵەڕاوكێی هەموو ئەو كەسانەی پەیامەكەیان پێ گەیشتووە بەتایبەت كە ئێستا هێرشی ئەمریكا بۆ سەر ئەو وڵاتە لە ئانوساتدایە.
ئەمە لەكاتێكدایە كە دوێنێ یەكشەممە لە چەند زانكۆیەكی ئێران بۆ مەڕاسیمی چلەی قوربانییانی خۆپیشادانەكانی مانگی رابردوو، خۆپیشاندان و گردبوونەوە ئەنجامدرا، لە ئەنجامدا بەهۆی رووبەڕووبوونەوە لەگەڵ هێزە ئەمنییەكان چەند قوتابییەك بریندار بوون.
لای خۆیەوە رۆژنامەی (نیۆیۆرك تایمز)ی ئەمریكی بڵاوی كردۆتەوە: دۆناڵد ترەمپ سەرۆكی ئەمریكا بە راوێژكارەكانی راگەیاندووە كە جددی بیر لە هێرشكردنە سەر ئێران دەكاتەوە بۆ ئەوەی بەپرسان ناچار بكات واز لە دەسەڵات بهێنن، ئەمە ئەگەر هەوڵە دبلۆماسییەكان لەگەڵ ئەو وڵاتە سەری نەگرت.
بڕیارە رۆژی پێنجشەممەی ئەم هەفتەیە شاندی دانوستانكاری ئێران و ئەمریكا جارێكی دیكە لە جنێفی پایتەختی سویسڕا كۆببنەوە، پێدەچێت ئەمە دوایین گەڕی دانوستانی نێوان هەردوولا بێت پێش هێرشی سەربازی.