ئێران هەڕەشە دەکات

هاوكات لەگەڵ هەوڵەكان بۆ دەست پێكردنەوەی دانوستانەكانی ئێران و ئەمەریكا، ئەمڕۆ ئێران رای گەیاند كە وەڵامی وەڵامێكی ئەمەریكای بۆ پێشنیازێكی ئاگربەست داوەتەوە، گەمارۆی دەریایی و ئاسمانی ئەمەریكا لەسەر ئێران بەردەوامە، سوپای ئێران هەڕەشە دەكات و ئاماژە بۆ زیادكردنی مەودای مووشەكەكانی دەكات
ئەمڕۆ محەمەد ئەكرەمی نیا گوتەبێژ بە ناوی سوپای ئێران رای گەیاند، لە دوای شەڕی ئەمەریكا، تاران مەودای مووشەكەكانی زیاد دەكات، ئەوەش بەو هۆیەی ئێستە هێزەكانی ئەمەریكا لە دووری هەزار كیلۆمەتر لە كەناراوەكانی ئێران جێگیرن. 
ئەو بۆ ئاژانسی "فارس"ی روون كردەوە، لەو شەڕە گەیشتینە ئەو ئەنجامەی پێویستە مەودای مووشەكەكانمان زیاتر بكەین، بە كردەنیش دەستمان بە هەنگاوەكان بۆ ئەو مەبەستە كردووە.
دوێنێ پیت هیگسیس وەزیری جەنگی ئەمەریكا رای گەیاند كە سەرۆك ترەمپ چەندان بژارەی بۆ مامەڵەكردن لەگەڵ ئێران بە دەستە، لەوانە سەربازی، ئاماژەی بۆ ئەوەش كرد كە گەمارۆی دەریایی بۆ سەر بەندەرەكانی ئێران بەردەوامە و كاریگەرە، لەوكاتەی سكۆت بێسنت وەزیری گەنجینەی ئەمەركیا دووپاتی كردەوە كە ئێرانیان دابڕیوە و ئێستە یەك بەرمیل نەوت هەناردە ناكات، ئەوەش ئابوورییانەی دەیخنكینێت.