ئێران گەمارۆی ئەمریکا شکاند

​ئاژانسی هەواڵی "ڕۆیتەرز" لە ڕاپۆرتێکی بەدواداچووندا ئاشکرای کرد، بەگوێرەی زانیارییە هەواڵگرییەکان و شیكاریی پسپۆڕانی گواستنەوەی دەریایی، سەرەڕای گەمارۆ دەریایییە توندەکەی ویلایەتە یەکگرتووەکانی ئەمریکا، ئێران توانیویەتی لە مانگی تەممووز و ئەیلوولی ڕابردوودا هەشت کەشتیی غازی شل (LPG) و کەشتییەکی هەڵگری سووتەمەنیی فڕۆکە لە ڕێگەی دەریایییەوە هەناردە بکات.
بەپێی زانیاریی چوار سەرچاوە لە بواری ئاسایشی دەریایی و چاودێریکردنی جووڵەی نەوت لە ناوچەی کەنداو، تاران لە چەند هەفتەی ڕابردوودا ئەو بارانەی شاردووەتەوە لە ڕێگەی تێکەڵکردنیان لەگەڵ پرۆسەی گواستنەوەی "کەشتی بۆ کەشتی" کە لەلایەن بەرهەمهێنەرانی دیکەی کەنداو لە کەناراوەکانی عومان ئەنجام دەدرێت. 
هەرچەندە ئەم قەبارەیە تەنها بەشێکی کەمە لە ئاستی هەناردەی پێشووی وزەی ئەو وڵاتە، بەڵام بەڵگەیەکە لەسەر ئەوەی بەرهەمە نەوتییە پاڵێوراوەکان هێشتا ڕێگەی خۆیان دەدۆزنەوە، تەنانەت لە کاتێکدا گەمارۆکە هەناردەی نەوتی خاوی ئێرانی بە تەواوی پەکی خستووە.
​لەلایەکی دیکەوە، شیکارییەکی ڕێکخراوی "یەکگرتووان لە دژی ئێرانی ئەتۆمی" (UANI) کە بنکەکەی لە ئەمریکایە و لە ڕێگەی مانگە دەستکردەکانەوە چاودێریی جووڵەی کەشتییەکان دەکات، دەریخستووە لانیکەم هەشت کەشتیی غازی شل لە ناوەڕاستی مانگی تەممووزەوە لە کەنداوی عومان دەرچوون؛ هاوکات بەڵگەکانی گرووپی هەواڵگریی دەریایی "سیناماکس" دەریدەخەن کە کەشتییەکی هەڵگری سووتەمەنیی فڕۆکەی ئێرانی لە مانگی ئەیلوولدا گەیشتووەتە وڵاتی میانمار.
​ئەم پەرەسەندنانە لە کاتێکدایە واشنتن لە ١٤ـی تەممووز، دوای شکستهێنانی لێکگەیشتنە سەرەتایییەکانی مانگی حوزەیران، گەمارۆ دەریایییەکانی بۆ سەر هەناردەی نەوتی ئێران سەپاندەوە. 
لەو بارەیەوە، بەرپرسێکی سەربازیی ئەمریکا بە ڕۆیتەرزی ڕاگەیاندووە کە تێپەڕبوونی هیچ کەشتییەک بە مانای دەربازبوونی تەواوەتی لە گەمارۆکان نییە، بەڵکوو هەڵسەنگاندن بۆ بەڵگەنامەی کەشتییەکان بە جیا دەکرێت و لە هەندێک حاڵەتیشدا بە هۆکاری مرۆیی ڕێگە بە تێپەڕبوونیان دەدرێت.