بڕیارێک لە مەسرور بارزانییەوە

 بە بڕیاری بەرێز مەسروور بارزانی سەرۆکی حکومەتی هەرێمی کوردستان نەخۆشخانەی ئازادی لە دهۆک نۆژەن دەکرێتەوە
نەخۆشخانەکە خزمەت بە نزیکەی دوو ملیۆن کەس دەکات و ئامێری پێشکەوتووی بۆ دابین دەکرێت
 ئەمڕۆ سێشەم، بە بڕیاری مەسروور بارزانی سەرۆك وەزیرانی كوردستان، پرۆسەی نۆژەنكردنەوەی نەخۆشخانەی ئازادی لە پارێزگای دهۆك دەستی پێ كرد.
پرۆسەی نۆژەنكردنەوەكە بە قۆناغ جێبەجێ دەكرێت و گۆڕینی سەرجەم كەرەستە تەندروستییە كۆنەكان و دابینكردنی ئامێری پێشكەوتوو لەخۆ دەگرێت.
ئامارەكانی نەخۆشخانەكە دەریدەخەن كە ڕۆژانە نزیكەی 2,500 نەخۆش سەردانی دەكەن، لە كۆی 650 قەرەوێڵە، ڕۆژانە 70%ی پڕ دەبن و مانگانە زیاتر لە 65 بۆ 70 هەزار كەس لەم نەخۆشخانەیە چارەسەر وەردەگرن.
 د. سەكڤان سلێمان بەڕێوەبەری نەخۆشخانەی ئازادی ڕای گەیاند، قۆناغەکانی نۆژەنكردنەوە دەستیان پێ كردووە و ئێستە پرۆسەی بەدیجیتاڵكردنی خزمەتگوزارییەكان لە ئارادایە.
 زیاتر گوتی، چاوەڕێ دەكرێت لە ماوەیەكی نزیكدا ئامێری تیشكی موگناتیسی (MRI) و تیشكی تەنۆكەیی (CT Scan) بۆ نەخۆشخانەكە دابین بكرێن.
 جێی باسە نەخۆشخانەی ئازادی لە ساڵی 1986 دامەزراوە، بە شێوەیەکی گشتی خزمەت بە نزیكەی دوو ملیۆن كەس لە سەرانسەری پارێزگای دهۆك دەكات.