فڕۆکە جەنگییەکانی ئیسرائیل گەیشتنە ئاسمانی ئێران

ئەمڕۆ چوارشەم 21ی ئۆکتۆبەر، میدیاکانی ئیسرائیل ئاشکرایان کرد کە دەیان فڕۆکەی جەنگیی وڵاتەکەیان بەسەر ئاسمانی عێراق و سووریادا تێپەڕیون و گەیشتوونەتە سەر سنوورەکانی ئێران، ئەمەش وەک ئامادەکارییەک بۆ جەنگ و بە مەبەستی ترساندنی تاران ئەنجام دراوە.
کەناڵی 12ی ئیسرائیلی بڵاوی کردەوە، سەرچاوەکانی ئەمەریکا پێیان ڕاگەیاندوون کە ئەو فڕینە ئاسمانییانە وەک مانۆڕێک بوون بە مەبەستی ڕێگریکردن و ترساندنی ئێران.
کەناڵەکە زیاتر ڕوونی کردووەتەوە کە فڕۆکە ئیسرائیلییەکان لە شەوی دووشەم لەسەر سێشەم ئەو فڕینانەیان ئەنجام داوە، ئەمەش هاوکات بووە لەگەڵ سەردانەکەی پیت هێگسێس وەزیری بەرگریی ئەمەریکا بۆ ئیسرائیل.
سەرەڕای ئەوەی هەندێک لە بەرپرسانی ئیسرائیل و ئەمەریکا بانگەشەی ئەوە دەکەن کە فڕینەکان ئاسایی بوون و ئامانج لێیان تەنیا ترساندنی ئێران بووە، بەڵام بەپێی زانیارییەکانی کەناڵەکە، دەکرا ئەم هەنگاوە ببێتە هۆی هەڵسەنگاندنی هەڵە لەلایەن ئێرانییەکانەوە و کاردانەوەی ئێرانی لێ بکەوێتەوە، بە جۆرێک کە گرژییەکان ئاستێکی مەترسیدار وەربگرن و ببنە هۆی دەستپێکردنەوەی جەنگ.
لە بەشێکی تری هەواڵەکەدا هاتووە کە ئەو فڕینە ئاسمانییە وەک ئامادەکارییەک بۆ هێرشکردنە سەر ئێران داڕێژرابوو، فڕۆکەکان بەسەر سووریا و عێراقدا فڕیون، کاتێکیش زۆر نزیک بوونەتەوە لە سنوورەکانی ئێران، سووڕاونەتەوە و گەڕاونەتەوە بۆ ئیسرائیل.
سەرچاوە ئەمەریکییەکان ئاماژەیان بەوە کردووە کە ئیسرائیل دەیزانی سیستەمی بەرگریی ئاسمانیی ئێران ئەو فڕۆکانە دەبینێت. بەپێی گوتەی ئەو سەرچاوانە، ئیسرائیل پێشوەختە ئەمەریکای ئاگادار کردووەتەوە و ڕای گەیاندووە کە ئەوە تەنیا مانۆڕێکی مەشقکردنە لە چوارچێوەی "پیشاندانی هێزی سەربازی" بۆ ترساندنی ئێران.