تا دێت و رۆژ دوای رۆژ ژماره‌ی قوربانییانی بوومه‌له‌رزه‌كه‌ی هه‌ردوو وڵاتی توركیا و سووریا به‌رز ده‌بێته‌وه و له نوێترین ئاماردا ئاماژه به‌وه‌دراوه كه ژماره‌ی گیانله‌ده‌ستدان بۆ نزیكه‌ی 18 هه‌زار كه‌س به‌رزبۆته‌وه.
به‌گوێره‌ی ئاماره‌كان تا دوای نیوه‌ڕۆی ئه‌مڕۆ پێنجشه‌م تیمه‌كانی گه‌ڕان له وڵاتی توركیا ته‌رمی 14 هه‌زار و 14 كه‌سیان له‌ژێر دار و به‌ردووی باڵه‌خانه و خانووه‌كاندا دۆزیوه‌ته‌وه، سه‌باره‌ت به سووریاش تیمه‌كان تا ئێستا 3 هه‌زار و 162 ته‌رمیان دۆزیوه‌ته‌وه، به‌مه‌ش ژماره‌ی گیانله‌ده‌ستدانی بوومه‌له‌رزه له هه‌ردوو وڵات بریتییه له 17 هه‌زار و 176 كه‌س.
ئه‌مه له‌كاتێكدایه كه ڕوانگه‌ی سووری بۆ مافه‌كانی مرۆڤ باس له ژماره‌یه‌كی زیاتری گیانله‌ده‌ستدان له سووریا ده‌كات و به‌گوێره‌ی دوایین داتا و ئاماره‌كانی ئه‌وان تا ئێستا ته‌رمی 3 هه‌زار و 550 كه‌س له‌ژێر دار و به‌ردووی باڵه‌خانه و خانووه‌كان ده‌رهێنراون.
سه‌باره‌ت به ژماره‌ی بریندارانیش، داتاكان ده‌ری ده‌خه‌ن كه له وڵاتی توركیا زیاتر له 63 هه‌زار كه‌س بریندار بوون، له وڵاتی سووریاش زیاتر له 5 هه‌زار بریندار هه‌یه.
هه‌موو ئه‌مانه‌ش به‌هۆی ئه‌و بوومه‌له‌رزه‌یه بوو كه به‌ره‌به‌یانی رۆژی دووشه‌می ڕابردوو له چه‌قی پارێزگای مه‌ڕه‌ش له خاكی توركیا به گوڕی 7.8 پله‌ی ڕێخته‌ر ڕووی دا و كاریگه‌رییه‌كه‌شی گه‌یشته سووریا و زۆرێك له وڵاتانی ده‌روبه‌ری و زیان و كاره‌ساتێكی گه‌وره‌ی به‌دوای خۆیدا هێنا.
وەڵام بدەوه