ئابراهام ماسلۆ گەورە دەروون ناس و نووسەری ئەمریکی دبێژیت:
سەیرکردنی بەردەوامی مێدیایەکی تایبەتی
ئاڕاستەکراو یا خۆگرێدان بە تاقە دەزگایەکی راگەیاندن، خوێندنەوەی رۆژانەی کتێب و چاپەمەنی سەربە ئاراستەیەکی فکری دیاریکراو یا ئایدیۆلۆجیایەک، گوێ گرتن لە تاقە سەرچاوەی هەواڵ و زانیاری و وتاری تایبەت سەربە یەک دامەزراوە، بەشداری کردن و بەدواداچوون و نواندنی چالاکی لە ناو یەک گرووپی سیاسی و مەزهەبی و ئایینی وکۆمەڵایەتی تاک رەهەند، یا بە تەعبیرێکی تر داخستنی فکر و مێشک بەرەو جیهانی رەنگاڵەی فکر و ئایدیاو لە قاڵبدانی لە ناو چوارچێویەکی تەسکی کۆنترۆڵ کراودا، دەرفەتی هەرجۆرە تازەگەری و بیرۆکەی نوێ و دیدگاو گۆشەنیگای تازە لە مرۆڤ دەسێنێتەوەو دەیکا بە بکەرێکی سنووردار و ئاڕاستەکراوو بێ فکرو روئیاو ئایدیاوە.
ژیان بریتیە لە جووڵەو هەنگاونان بەرەو ئاییندە، واتە کردنەوەی داڵان وخانەکانی مێشک و زیهن و رووبەرووبوونەوەی هۆشیارانە و رەخنەگرانە لەگەڵ شێوازە جۆراوجۆرەکانی بیرکردنەوەو هێنانەکایەی ریفۆرمێکی ڕادیکاڵی بەسەر زهنیەت و عەقڵ ومەعریفەی تاکە کەسیدا.
کاتێک تاکەکانی کۆمەڵگا هاوڕێ و هاودەمی کتێب و خولیای خوێندنەوەن، سیمای کۆمەڵگا گۆڕانکاری گەورەی بەسەردا دێت و لە دۆخی خەواڵووێی و چەقبەستوویی و بێدەرەتانی و هەژاری مەعریفەو روناکبیری رزگاری دەبێت. ئەم سیمایە رەنگە لە چەشنی شوناس یا روناکبیری لە هەڵسوکەوت و رەفتاری رۆژانەی تاکەکاندا رەنگ بداتەوەولە دۆخە جیاوازەکاندا کۆمەڵگای پێ بناسرێتەوە و وەک ئایکۆن و هێماو مۆرکێکی تایبەت، ببێ بە پێناسی ئەم جۆرە کۆمەڵگایە.
لە دۆخی ترسناکی دابەشبوونی کۆمەڵگا بەسەر رەهەندو رەنگ و ئایدیۆلۆجیاو ئاڕاستەو بەرژەوەندیە دژ بەیەکەکاندا، نووسین ئەرکێکی قورس و بێ چێژ و کوتانی ئاسنی ساردە و واز هێنان لێی باشترین بژاردەیە لە پێناو ئاسوودەیی دەرووندا!
وەڵام بدەوه