ئینتیفاز قەنبەر سیاسەتوانی دیاری عێراقی لە ئەمەریكا، لە پۆستێکدا لە تۆڕی کۆمەڵایەتیی فەیسبووک بڵاوی كردووەتەوە، کە ئیدارەی دۆناڵد ترەمپ سەرۆکی ئەمەریکا، سەردانێکی محەمەد شیاع سوودانی سەرۆک وەزیرانی عێراقی بۆ واشنتن ڕەت کردووەتەوە. هاوکات دووپاتی کردەوە کە هەمان ئیدارە پشتگیری لە وەرگرتنەوەی خوولی دووەمی سەرۆکایەتیی وەزیران لەلایەن سوودانییەوە ناکات.
قەنبەر، کە پۆستە بڵاوكراوەكەی خۆی لە فەیسبووك بە "گرنگ" وەسف کردووە، نووسیویەتی، ئیدارەی سەرۆک ترەمپ سەردانی سەرۆک وەزیرانی عێراق، محەمەد شیاع سوودانی بۆ واشنتن ڕەت دەکاتەوە و بۆ ئەمەیش پشتی بە قسەی سەرچاوە باڵاکان بەستووە لە ئەمەریكا.
هەروەها دەشڵێت، هەمان سەرچاوەکان بۆیان دووپات کردمەوە کە ئیدارەی ترەمپ پشتگیریی خوولی دووەمی سەرۆک وەزیران سوودانی ناکات.
ئینتیفاز قەنبەر لە کۆتایی پۆستەکەیدا ئاماژەی بەوە کردووە کە پێشتر چەندین جار هۆشداریی لەم دۆخە و هۆکارەکانی پشت پەردەی داوە.
ئەم لێدوانە، ئاماژەیە بۆ قووڵبوونەوەی ناکۆکییەکانی نێوان ئیدارەی ئێستای ئەمەریکا و حکوومەتی عێراق.
وەڵام بدەوه