پرۆژەی رزگارکردنی عێراق راگەیاندرا

ئەمڕۆ چوارشەممە، دوای ئەوەی ماركۆ رۆبیۆ وەزیری دەرەوەی ویلایەتە یەكگرتووەكانی ئەمەریكا، رایگەیاند كە وەزاررەتەكەی هەر چوار گرووپی میلیشیایی عێراقیی نزیك لە ئێران (كەتائیبی سەید ئەلشوهەدا، بزووتنەوەی نوجەبا، بزووتنەوەی ئەنساڕوڵای ئەوفیا و كەتائیبی ئیمام عەلی) دەخاتە لیستی رێكخراوە تیرۆریستییەكانەوە، كۆنگرێسمانی ئەمەریكی جۆو وێڵسون لە راگەیەندراوێكدا گوتی: ”سوپاسی سەرۆك ترەمپ دەكەم لەپای ئەوەی كە چوار ملیشیای عێراقیی خستە لیستی رێكخراوە تیرۆریستییەكانەوە كە لەلایەن ئێرانەوە كۆمەك دەكرێن، ئەم بڕیارە بەدەنگەوەهاتنی داواكارییەكی من بوو كە لە (پرۆژەیاسای رزگاركردنی عێراق لە ئێران) نووسیومە. ئەم رێوشوێنە دەكرێ لە ڕێیەوە سەرچاوەی داهات و پارەپێدانی ئەم گرووپە تیرۆریستییانە وشك بكرێت.“