دۆناڵد ترەمپ سەرۆكی ئەمەریكا پەیوەندییە تەلەفۆنییەكەی ئەمڕۆ پێنجشەممەی لەگەڵ ڤلادیمیر پووتین سەرۆكی رووسیا بە نموونەیی وەسف كرد سەبارەت بە هەوڵەكان بۆ راگرتنی شەڕی ئۆكڕاینا، جەختیشی كردەوە كە لە ئایندەیەكی نزیكدا بەیەكەوە كۆدەبنەوە.
ترەمپ دوای پەیوەندییە تەلەفۆنییەكەی لەگەڵ پووتین، لە پۆستێكی تۆڕی كۆمەڵایەتی (ترووس سۆشیاڵ) رایگەیاند: سەرۆكی رووسیا پیرۆزبایی لێ كردم بەرامبەر دەستكەوتە مێژووییەكەمان سەبارەت بە كۆتاییهێنان بە جەنگی غەززە و هێنانەكایەی ئاشتی لە رۆژهەڵاتی ناوەڕاست.
راشیگەیاند: بەدڵنیاییەوە كۆتاییهێنانی شەڕی غەززە، كاریگەری گەورەی دەبێت لە هەوڵەكان بۆ راگرتنی شەڕ نێوان ڕووسیا و ئۆكڕاینا.
بەگوێرەی پۆستەكەی تۆڕی كۆمەڵایەتی (ترووس سۆشیاڵ)، هەردوو سەرۆك لە پەیوەندییە تەلەفۆنییەكەدا باسیان لە پێشخستنی پەیوەندییە بازرگانییەكانی نێوان رووسیا و ئەمەریكایان كردووە لە دوای كۆتاییهێنان بە شەڕی ئۆكڕاینا.
هەروەها رێككەتوون لەسەر ئەوەی هەفتەی داهاتوو شاندی باڵای هەردوو وڵات كۆبوونەوەی گرنگ ئەنجام بدەن، دواتریش وادەی دیداری لووتكە و كۆبوونەوەی نێوان ترەمپ و پوویتن دیاری بكەن.
ترەمپ ئاماژەی بەوەشداوە كە كۆبوونەوەی داهاتووی لەگەڵ پووتین لە شاری بۆداپێستی پایتەختی هەنگاریا دەبێت و تەوەری سەرەكی باسەكەیان كۆتاییهێنان بە جەنگی ئۆكڕاینا دەبێت.
بڕیاریشە سبەی هەینی، دۆناڵد ترەمپ سەرۆكی ئەمریكا لە كۆشكی سپی لەگەڵ ڤۆلۆدیمیر زیلینسكی سەرۆكی ئۆكراینا كۆببێتەوە و گفتوگۆ لەبارەی پەیوەندییە تەلەفۆنییەكەی پووتین و دوایین هەوڵەكان بۆ راگرتنی شەڕ تاوتوێ بكەن.
وەڵام بدەوه