دۆناڵد ترامپ، سەرۆکی ئەمریکا فەرمانی دەرکرد بە ئەنجامدانی پێداچوونەوەیەکی بەرفراوان بۆ ئەو داواکارییانەی پەنابەری کە لە سەردەمی سەرۆکی پێشوو جۆ بایدن پەسەند کراون، هەروەها ئەو کارته سه‌وزه‌ى مانەوە كه بە هاوڵاتیانی 19 دەوڵەت دراوە.
بەپێی هەواڵی "ڕۆیتەرز"، بەرپرسانی ئەمریکی دەڵێن "کۆچبەرێکی ئەفغانی کە گومانی ئەوەی لێدەکرێت تەقەی لە دوو ئەندامی پاسەوانی نیشتمانی لە واشنتۆنی پایتەخت کردبێت، لە ساڵی 2021 بەپێی بەرنامەی نیشتەجێکردنەوە هاتووەتە ویلایەتە یەکگرتووەکان".
چەند کاتژمێرێک دوای تەقەکردنەکە، کە بووە هۆی برینداربوونی دوو ئەندامی پاسەوانی نیشتمانی بە سەختی، فەرمانگەی خزمەتگوزارییەکانی ڕه‌گه‌زنامه و کۆچی ئەمریکی ڕایگەیاند کە دەستبەجێ و تا کاتێکی نادیار کارکردن لەسەر هەموو داواکارییەکانی کۆچکردن کە پەیوەندییان بە هاووڵاتیانی ئەفغانستانەوە هەیە، ڕادەگرێت.
وەزارەتی ئاسایشی ناوخۆی ئەمریکا، ڕۆژی پێنجشەممە ڕایگەیاند، ئیدارەی ترامپ بازنەی ئەم هەنگاوە فراوانتر دەکات بۆ ئەوەی پێداچوونەوە بە هەموو ئەو داواکارییانەی پەنابەریدا بکرێت کە لە سەردەمی ئیدارەی بایدن پەسەند کراون.
بەپێی دۆکیومێنتێکی حکوومی ئەمریکی کە ده‌ست "ڕۆیتەرز" كه‌وتووه، گومانلێکراوەکە لەمساڵدا لە سەردەمی ترامپدا مافی پەنابەری وەرگرتووە.
جۆزێف ئیدلۆ، بەڕێوەبەری فەرمانگەی خزمەتگوزارییەکانی ڕه‌گه‌زنامه و کۆچی ئەمریکی، لە بەیاننامەیەکدا ڕایگەیاند، "فەرمانم داوە بە پشکنینێکی ورد و گشتگیر بۆ هەموو کارتی مانەوەی سەوز بۆ هەموو بیانییەک لە هەموو ئەو وڵاتانەی جێگەی نیگەرانین بەپێی داواکارییەکەی ترامپ".
سەبارەت بەو وڵاتانەی کە بە "جێگەی نیگەرانی" دادەنرێن، ئیدارەی ئەمریکا ئاماژەی بەو 19 وڵاتە کرد کە لە ڕاگەیەندراوێکی سەرۆکایەتیدا لە مانگی حوزەیران، بڵاوکراوەتەوە.
ئەو 19 وڵاتە بریتین لە ئەفغانستان، بۆرما، چاد، کۆنگۆ، گینیا، ئەریتریا، هایتی، ئێران، لیبیا، سۆماڵ، سوودان، یەمەن، بۆروندی، کووبا، لاوس، سیرالیۆن، تۆگۆ، تورکمانستان و ڤەنزوێلا.
وەڵام بدەوه