دۆناڵد ترەمپ، سەرۆکی ئەمریکا هۆشدارییەکی توند ئاراستەی کۆماری ئیسلامیی ئێران دەکات و ڕایدەگەیەنێت، ئەگەر تاران نەگاتە ڕێککەوتنێکی نوێ لەگەڵ واشنتن، ئەوا چارەنووسی ئێران وەک ڤەنزوێلای لێدێت، ئەمەش هاوکاتە لەگەڵ بوونی ناکۆکییەکی قووڵ لەسەر ئەجێندای دانوستانە بڕیارلێدراوەکانی سوڵتاننشینی عومان.
بەپێی ڕاپۆرتە هەواڵییەکان، ترەمپ ئاماژەی بەوە کردووە کە ئەگەر ئێران نەچێتە ژێر باری داواکارییەکانی ئەمریکا، ڕووبەڕووی هەمان ئەو فشار و داڕمانە دەبێتەوە کە ڤەنزوێلا پێیدا تێپەڕی. ئەم هۆشدارییە لە کاتێکدایە کە واشنتن 4 مەرجی سەرەکی بۆ هەر ڕێککەوتنێک داناوە، کە بریتین لە: کۆتاییهێنان بە بەرنامەی ئەتۆمی، ڕاگرتنی پڕۆژەی مووشەکی بالیستی، بڕینی هاوکاری گروپە بریکارەکانی لە ناوچەکە و گۆڕینی شێوازی مامەڵەکردن لەگەڵ خۆپیشاندەرانی ناوخۆ.
لەلایەکی دیکەوە، ئاژانسی "ڕۆیتەرز" لە زاری چەند بەرپرسێکی ناوچەکەوە بڵاویکردەوە، ئێران هێشتا پێداگری دەکات کە دانوستانەکان تەنها لە چوارچێوەی مەلەفی ئەتۆمیدا بن، بەڵام ئیدارەی ترەمپ سوورە لەسەر ئەوەی هەموو دۆسیە ناکۆکەکان پێکەوە تاوتوێ بکرێن. ئەم جیاوازییە گەورەیە لە نێوان تێڕوانینی هەردوولادا، ئەرکی دیپلۆماتکارانی لە عومان ئاڵۆز کردووە.
چاودێرانی سیاسی و میدیا ئیسرائیلییەکان ئاماژە بەوە دەکەن، کە ترەمپ لە ڕێگەی ئەم دانوستانانەوە دەیەوێت شەرعییەتی ناوخۆیی و نێودەوڵەتی بۆ هەر هەنگاوێکی داهاتوو کۆبکاتەوە. کۆشکی سپیش دووپاتی کردووەتەوە کە هەرچەندە دیپلۆماسی لە پێشینەیە، بەڵام بژاردەی سەربازی وەک کارتێکی فشار لەسەر مێزی سەرۆکی ئەمریکا دەمێنێتەوە بۆ مامەڵەکردن لەگەڵ تاران لە ئەگەری شکستهێنانی گفتوگۆکان.
وەڵام بدەوه