حەمید ڕەزا قەنبەری، یاریدەدەری وەزیری دەرەوەی ئێران بۆ کاروباری ئابووری، ئاشکرای کرد کە وڵاتەکەی هەوڵی جدی دەدات بۆ فراوانکردنی هاوکارییە ئابوورییەکان لەگەڵ ویلایەتە یەکگرتووەکانی ئەمریکا و پرسی کڕینی فڕۆکەی مەدەنی بۆ نوێکردنەوەی کەشتیگەلە ئاسمانییەکەی ئێران یەکێکە لە تەوەرە سەرەکییەکانی ئەو هەوڵانە.
بەپێی هەواڵێكی (ئاژانسی فارس) كە (RT) رووسی وەرگێڕانی بۆ كردووە، حەمید ڕەزا قەنبەری ئاماژەی بەوە کردووە کە گفتوگۆ ئەگەرییەکان لەگەڵ واشنتۆن تەنیا لە چوارچێوەی سیاسیی تەسکدا نامێننەوە، بەڵکوو بوارە بازرگانی و وەبەرهێنانە ستراتیژییەکانی وەک نەوت، غاز و کانزاکان دەگرێتەوە.
ئەو بەرپرسە ئێرانییە جەختی لەوە کردەوە کە بۆ بەردەوامبوونی هەر ڕێککەوتنێک لەداهاتوودا، پێویستە ئەمریکاش سوودی ئابووری بەرجەستە و خێرا بەدەست بهێنێت، تا هاوسەنگیی دەستکەوتەکان و بەردەوامیی لێکتێگەیشتنەکان مسۆگەر بکرێت.
هەروەها باس لەوە کراوە کە بەشێکی گرنگی ڕێککەوتنە چاوەڕوانکراوەکە سەرنج دەخاتە سەر ئازادکردنی داراییە بلۆککراوەکانی ئێران لەدەرەوەی وڵات، بەمەرجێک ئەم هەنگاوە بە شێوەیەکی کردەیی و هەمیشەیی بێت، نەک تەنیا وەک هێمایەک یان کارێکی کاتی.
قەنبەری لە بەشێکی دیکەی قسەکانیدا داوای کردووە کە چالاکییە ئابوورییە ناوخۆییەکانی ئێران بە ئەنجامی ئەم دانوستانانەوە گرێ نەدرێن، بۆ ئەوەی چەرخی ئابووریی نیشتمانی لە چاوەڕوانیی ئەنجامە نادیارەکاندا پەککەوتە نەبێت.
وەڵام بدەوه