بەهێزترین وڵاتی ئەوروپا دێتە ناو شەڕەکە

دوای ئەوەی بە درۆنێكی ئێران هێرش كرایە سەر سەربازانی فڕەنسا لە هەولێر، حكوومەتی فڕەنسا كۆدەبێتەوە و تاوتوێی بژاردەیوەڵامدانەوەی هێرشەكە دەكات.
ئەمڕۆ هەینی 13ی ئادار، ماڵپەڕی كەناڵی سكای نیوز بڵاوی كردووەتەوە، ئەنجوومەنی وەزیرانی بەرگری فڕەنسا كۆدەبنەوە و تاوتوێی ئەو هێرشە دەكەن كە بە فڕۆكەیەكی ئێران كرایە سەر هێزەكانیان لە هەولێر.
بەرپرسانی فڕەنسی باسیان لەوە كردووە كۆبوونەوەكە ئەمڕۆ بەڕێوە دەچێت و ئامانجیش تاوتوێكردنی بارودۆخەكە و بژاردەی وەڵامدانەوەی هێرشەكەیە، كە دوێنێ‌ كرایە سەر سەربازانی فڕەنسا.
 ئەمڕۆ بەرپرسێكی فڕەنسی بە ئاژانسی فرانس پرێسی راگەیاند، ئەو هێرشەی كراوە بە درۆنێكی ئێرانی بووە كە بە "شاهید" دەناسرێت. 
شەوی رابردوو ئیمانوێڵ ماكرۆن سەرۆكی فڕەنسا رای گەیاند ئەفسەرێكی فڕەنسی گیانی لەدەست داوە و ژمارەیەك سەربازیش بریندارن. ماكرۆن دووپاتی كردەوە قبووڵی ناكەن هێرش بكرێتە سەر سەربازانی فڕەنسا.
پێشتر چەند میلیشیایەكی شیعە لە عێراق هەڕەشەیان لە هێزەكانی فڕەنسا كرد بوو، بە هۆی ئەوەی ئەو وڵاتە بڕیاری داوە كەشتییەكی فڕۆكەهەڵگر بنێرێتە ناوچەی رۆژهەڵاتی ناوەڕاست.
سێ‌ سەرچاوەی تەناهی لە عێراق بۆ سكای نیوز باسیان لەوە كردووە، میلیشیاكانی شیعە رۆژی سێشەم و چوارشەمی رابردوو هێرشەكانیان لە ناوخۆی عێراق زیادی كردووە.
فڕەنسا هێزەكانی لە چوارچێوەی هاوپەیمانی نێودەوڵەتی لە عێراقە، ئەو وڵاتە نزیكەی چوار هەزار سەربازی لە وڵاتانی ناوچەكە بڵاوكردووەتەوە