لێدوانی نوێی ترەمپ

دۆناڵد ترەمپ، سەرۆکی ویلایەتە یەکگرتووەکانى ئەمەریکا ئاشکرای کرد، ئێرانییەکان خۆیان پێوەندییان پێوە کردووە و خوازیاری ڕێککەوتنن. دووپاتیشی کردەوە، ڕێگە نادەن ئێران ببێتە خاوەنی چەکی ئەتۆمی، بەڵام ئەگەر ڕێککەوتن بکرێت، ئێران دەتوانێت وەک وڵاتێکی بەهێز خۆی بنیات بنێتەوە.
ئەمڕۆ دووشەم، 23ی ئادار، ترەمپ رای گەیاند، ستیڤن ویتکۆف و جارید کۆشنەر، لە گفتوگۆدان لەگەڵ لایەنی ئێرانی. گوتیشی، "تەواوی ژیانم ڕێککەوتن بووە و پێموایە ڕێککەوتنێکی تریش لەگەڵ ئێران ڕوو دەدەدات، چونکە ئەوان خۆیان پێوەندییان کردووە".
زیاتر گوتی، ئیسرائیل بەم ڕێککەوتنە دڵخۆش دەبێت و دەبێتە سەرەتایەکی باش بۆ ناوچەکە بەڵام ناتوانم گەرەنتی رێککەوتنی ٪100 بدەم لەگەڵ ئێران.
سەرۆکی ئەمەریکا ئاماژەى دا، نابێت ئێران ببێتە خاوەنی چەکی ئەتۆمی و ئێمە مادە پیتێنراوەکەی ئێرانمان دەوێت. باسی لەوەیش کرد کە ئەگەر ڕێککەوتن بکرێت، دەسکەوتنی یۆرانیۆمی پیتێنراو ئاسان دەبێت و ئێران دەتوانێت ئابووریی خۆی ببوژێنێتەوە، هەروەها دووپاتی لە گرنگیی بەرهەمهێنانی زۆرترین بڕی نەوت کردەوە.
لەبارەی رابەڕی باڵای ئێستەی ئێران موجتەبا خامنەیی، ترەمپ گوتی، "هیچ زانیارییەکمان لەبارەیەوە نییە و نازانم لە ژیاندایە یان نا، بەڵام نامەوێت بکوژرێت". لە کۆتاییدا ئاماژەی بەوە کرد، کە ئێران بۆ ماوەی 47 ساڵە وەک هەڕەشە لە ناوچەکەدا ماوەتەوە و هیچ وڵاتێکیش لە دنیادا نییە لەسەر ئەم ڕایە دژایەتیم بکات.