ئەمریکا وادەی کۆتایی هاتنی جەنگەگە راگەیاندرا

وەزیری دەرەوەی ئەمریکا دەڵێ، حکومەتی وڵاتەکەی پێشبینی دەکات ئۆپەراسیۆنە سەربازییەکەی سەر ئێران لە دوو هەفتەدا کۆتایی بێت؛ ئاماژە بەوەش دەکات، دەتوانن ئامانجەکانیان لە ئێران بێ ناردنی هێزی زەوینی بۆ ئەو وڵاتە بەدەست بێنن.
رۆژی هەینی 27-3-2026 مارکۆ روبیۆ، وەزیری دەرەوەی ئەمریکا، دوای کۆبوونەوەی وەزیرانی دەرەوەی گرووپی حەوت لە فەرەنسا قسەی بۆ رۆژنامەڤانان کرد و لەبارەی کاتی کۆتاییهاتنی ئۆپەراسیۆنە سەربازییەکەی وڵاتەکەی بۆسەر ئێران گوتی، پێشبینی دەکەن لە دوو هەفتەی داهاتوودا کۆتایی بێت.
لەبارەی ئامانجەکانی ئەمریکاش لە جەنگەکەدا، مارکۆ روبیۆ گوتی، سوپای وڵاتەکەی دەتوانێت بێ ناردنی هێزی زەوینیش بۆ نێو ئێران ئامانجەکانی بەدەست بهێنێت.
وەزیری دەرەوەی ئەمریکا ئاماژەی بەوەشکرد، وەزارەتی جەنگی وڵاتەکەی ئامادەیە چەک و تەقەمەنییەکەی لە ئۆکرایناوە بۆ رۆژهەڵاتی نێوەڕاست بگوازێتەوە بە مەبەستی بەکارهێنانی لەم ئۆپەراسیۆنەدا.