وڵاتێکی بەهێز ڕێککەوتنی لەگەڵ ئیسرائیل ڕاگرت

ئیتالیا ڕێککەوتنی سەربازی لەگەڵ ئیسرائیل ڕاگرت. جۆرجیا میلۆنی سەرۆك وەزیرانی ئیتاڵیای رای گەیاند، بە هۆی هێرشەكانی ئیسرائیل بۆ سەر لبنان، ئیتاڵیا رێككەوتنی سەربازیی لەگەڵ ئیسرائیل رادەگرێت كە لە 2005 واژوو كراوە.
ئەمڕۆ سێشەم  14ی نیسان، جۆرجیا میلۆنی سەرۆك وەزیرانی ئیتاڵیا گوتی، "بەهۆی تێڕوانین لە بارودۆخی ئێستە، حكوومەت بڕیاری داوە نوێكردنەوەی رێككەوتنی بەرگری لەگەڵ ئیسرائیل رابگرێت".
ئەو رێككەوتنە لە ساڵی 2005 لە نێوان ئیتاڵیا و ئیسرائیل ئەنجام دراوە و پێنج ساڵ جارێك نوێ دەبێتەوە و بەگوێرەی رێككەتنەكە، ئەو دوو وڵاتە كەلوپەلی سەربازی و ئەزموون و توێژینەوەی بەرگری ئاڵوگۆڕ دەكەن.
میدیای فەرمی ئیتاڵیا دەڵێن، ئەم لێدوانەی میلۆنی ئاماژەیەكی سیاسییە لە دژی ئەو هێرشانەی كە سوپای ئیسرائیل بۆ سەر لبنان ئەنجام دەدەن، ئیتاڵیا و یەكێتیی ئەوروپایش سەركۆنەی هێرشەكانیان كردووە.