زەنگی شەڕ لێیدرا

ئەمڕۆ هەینی یەکی ئایاری 2026، ڕیچارد بلومێنتاڵ سیناتۆری دیموکراتەکان لە ئەنجوومەنی پیرانی ئەمەریکا، دووپاتی کردەوە کە ئەگەری هێرشێکی سەربازیی بەپەلە بۆ سەر ئێران زۆر بەهێزە، ئەوەش بە پشتبەستن بەو زانیارییانەی لە چەند ڕاپۆرتێکی میدیاییەوە وەریگرتوون.
بلومێنتاڵ لە لێدوانێکیدا بۆ تۆڕی (سی ئێن ئێن)ـی ئەمەریکی ڕای گەیاند، لێدانی سەربازی وەک هەنگاوێکی چاوەڕوانکراو ئەگەرێکی زۆر بەهێزە. ئاماژەی بەوەش دا، نابێت ئەم بابەتە ببێتە مایەی سەرسڕمانی هیچ کەسێک، چونکە ئەو سەرکردە سەربازییانەی پێوەندییان بەم هەوڵەوە هەیە، لە مێژە تاوتوێی ئەمەیان کردووە.
لە بەشێکی تری قسەکانیدا ئەو سیناتۆرە گوتی، ئەم بابەتە زۆر جێی نیگەرانییە، چونکە لەوانەیە گیانی گەلی ئەمەریکا بخاتە مەترسییەوە و ئەگەری هەیە زیانێکی زۆری مرۆیی لێ بکەوێتەوە.
ئەمە لە کاتێکدایە پێشتر لەمڕۆدا بەرپرسێکی باڵا لە ئیدارەی دۆناڵد ترەمپ سەرۆکی ئەمەریکا، ڕای گەیاند کە ئەو ئاگربەستەی لە مانگی نیسانەوە لەگەڵ ئێران چووەتە بواری جێبەجێکردنەوە، کۆتایی بە کردەوە سەربازییەکانی نێوان هەردوو لایەن هێناوە، ئەوەش کاتێک پێوەندی بە یاسای دەسەڵاتەکانی شەڕەوە هەبێت. جێی باسە شەڕ لەگەڵ ئێران بە هێرشی ئاسمانیی ئیسرائیل و ئەمەریکا لە 28ی شوبات دەستی پێ کردبوو.