باری نائاسایی لەسەر ئاستی جیهان راگەیاندرا

ڕێکخراوی تەندروستیی جیهانی (WHO)، باری نائاسایی تەندروستی لەسەر ئاستی جیهان ڕاگەیاند. ئەم بڕیارە دوای بڵاوبوونەوەی بەربڵاوی ڤایرۆسی "ئیبۆلا" دێت لە کۆماری کۆنگۆی دیموکرات، کە مەترسییەکی گەورەی بۆ سەر ئاسایشی تەندروستیی نێودەوڵەتی دروست کردووە.
بەپێی دوایین ئامارە فەرمییەکان، تا ئێستا ڤایرۆسەکە بووەتە هۆی گیانلەدەستدانی زیاتر لە ٩٠ کەس، هاوکات ژمارەی ئەو کەسانەی گومانی تووشبوونیان لێ دەکرێت ٣٥٠ کەسی تێپەڕاندووە. مەترسییەکان کاتێک زیاتر بوون کە ڤایرۆسەکە سنوورەکانی کۆنگۆی بڕی و گەیشتە وڵاتی ئۆگنداش.
ڕێکخراوی تەندروستیی جیهانی ئاماژەی بەوە کردووە، گەورەترین مەترسیی ئەم شەپۆلە لەوەدایە کە ئەو نەوەیەی ڤایرۆسەکە کە بڵاوبووەتەوە لە جۆری "بۆندیبۆجیۆ"یە. ئەم جۆرە یەکێکە لە مەترسیدارترین نەوەکانی ئیبۆلا، چونکە تا ئێستا هیچ کوتان (ڤاکسین) یان چارەسەرێکی پزیشکیی دیاریکراوی بۆ نەدۆزراوەتەوە.
بەرپرسانی تەندروستی لە کۆنگۆ و ڕێکخراوی جیهانی داوا لە هاووڵاتیان دەکەن ڕێکارە خۆپارێزییەکان توند بکەنەوە. داوا کراوە هاووڵاتیان لە تەوقەکردن و کۆبوونەوە قەرەباڵغەکان دوور بکەونەوە و بە وردی ئاگاداری نیشانەکانی نەخۆشییەکە بن. 
هاوکات، ڕێکخراوەکە جەختی کردەوە کە دەستبەجێ هاوکاریی پزیشکی و کەرەستەی پێویستیان گەیاندووەتە ئەو ناوچانەی پەتاکەی تێدا بڵاوبووەتەوە، بە ئامانجی ڕێگریکردن لە تەشەنەسەندنی زیاتری ڤایرۆسەکە.