پەیامێکی توند لە ترەمپەوە

​دۆناڵد ترەمپ، سەرۆکی ویلایەتە یەکگرتووەکانی ئەمریکا، لە پەیامێکی تونددا سەرکردەکانی ئێرانی بە "دووڕوو و ڕیاکار" وەسف کرد و ڕایگەیاند کە ئەوان لە ژێرەوە دەپاڕێنەوە بۆ دانوستان، بەڵام لەبەردەم کامێراکاندا ڕەتی دەکەنەوە، هاوکات جەختی لەوە کردەوە کە هێزی دەریایی ئەمریکا کۆنترۆڵی تەواوی گەرووی هورمزی لەدەستدایە و ئێران هەرگیز نابێتە خاوەنی چەکی ئەتۆمی.
​ئەمڕۆ دووشەممە، 3ـی ئابی 2026، دۆناڵد ترامپ لە تۆڕی کۆمەڵایەتیی (تروس سۆشیاڵ - Truth Social) ، هێرشێکی توندی کردە سەر دەسەڵاتدارانی تاران.
 ترەمپ نووسیویەتی: "سەرکردایەتیی ئێران بە شێوەیەکی باوەڕپێنەکراو دووڕوون! لە لایەکەوە داوای کۆبوونەوە دەکەن، تەنانەت هەندێک دەڵێن 'دەپاڕێنەوە'، گفتوگۆکان دەست پێدەکەن و وادەی دیکەش بۆ داهاتوویەکی نزیک دیاری دەکرێت؛ بەڵام بە شانازییەوە و بە ئاشکرا دەڵێن هیچ دانوستانێک لە ئارادا نییە و تەنیا لەگەڵ عومان مامەڵە دەکەن."
​لە بەشێکی دیکەی پەیامەکەیدا، سەرۆکی ئەمریکا گاڵتەی بە بانگەشەکانی ئێران سەبارەت بە کۆنترۆڵکردنی گەرووی هورمز کرد و ڕایگەیاند کە هێزی دەریایی ئەمریکا بە تەواوی کۆنترۆڵی ئەو ناوچەیەی کردووە.
 ئەو دۆخەکەی بە "گەمارۆ" یان وەک هەندێک دەڵێن "دیواری پۆڵایینی ویلایەتە یەکگرتووەکان" ناوبرد و هۆشداریی دا کە هیچ شتێک بەبێ مۆڵەتی ئەمریکا ناگاتە ئێران و لێناگەڕێن هیچ شتێکیش تێپەڕێت، مەگەر ئەوەی ڕێککەوتنێک بکرێت یان ئێران بە تەواوی خۆی ڕادەست بکات.
​ترەمپ لە کۆتایی پەیامەکەیدا جەختی لەوە کردەوە کە ئێران بیەوێت دان بەو ڕاستییەدا بنێت یان نا، لە ئێستادا ئەمریکا خەریکی گفتوگۆیە بۆ چارەسەرکردنی کێشەیەک کە خودی ئێران دەیان ساڵە دروستی کردووە. پەیامەکەی بە ڕستەیەکی یەکلاکەرەوە کۆتایی پێهێنا و نووسیویەتی: "بابەتەکە زۆر سادەیە: ئێران هەرگیز نابێتە خاوەنی چەکی ئەتۆمی!".