ترەمپ مەترسییەکە ئاشکراکرد

هاوكات لەگەڵ ئەو دۆخەی نە شەڕ و نە ئاشتییەی لە نێوان ئێران و ئەمەریكا هەیە، لێدوانی دژبەیەكی بەرپرسانی هەردوولا بەردەوامە، دۆناڵد ترەمپ سەرۆكی ئەمەریكا رای گەیاند كە وڵاتەكەی بەرانبەر بە شێوازی ئێران لە دانوستانەكان هەست بە بێئومێدی دەكات، ئەو تارانی بە فرتوفێڵ و ناڕاستگۆیی لە گفتوگۆكان تۆمەتبار كرد.  
ترەمپ لە قسەكانی بۆ بەرنامەیەكی ئێزگەی "دەنگی ئەمەریكا"، دووپاتی كردەوە كە ئێرانییەكان لەناو ژووری كۆبوونەوەكان لەگەڵمان رێك دەكەون، بەڵام لە میدیاكان ئەوەی لەسەری رێككەوتووین رەت دەكەنەوە، بۆیە ئەوان زۆر بە مەكرن و كەسانێكی جێی متمانە نین، ئاماژەی كرد كە ئەگەر لە ئێرانمان نەدابووایە، دەبوونە خاوەن چەكی ئەتۆمی، بۆیە شەڕەكە بۆ رێگرتن لە تاران لە بوونی بە خاوەن ئەو چەكە پێویست بوو. 
ترەمپ ئاماژەی كرد كە ئێستە نرخی نەوت بە بەراورد بە سەردەمی جۆر بایدن، سەرۆكی پێشووی ئەمەریكا هەرزانترە، دۆخی ئێستەی ئابووریی ئێران ئاڵۆزە و تاران لەژێر گوشارێكی گەورەی ئابوورییدایە، ئێستە ئێمە كۆنترۆڵی تەواوەتیی سامانی ئێران دەكەین، ئەوان تەنانەت مووچەی سەربازانی خۆشیان پێ نادرێت و رێژەی هەڵاوسان لەو وڵاتە گەیشتووەتە 300% و دراوەكەیان بێ بەها بووە.