ئەمریکا قسەی کۆتایی دەکات لەبارەی ئێران

دۆناڵد ترەمپ، سەرۆکی ویلایەتە یەکگرتووەکانی ئەمریکا، ئامادەکاری دەکات بۆ توندکردنەوەی زیاتری گوشارە ئابوورییەکانی سەر ئێران لە ڕێگەی سەپاندنی زنجیرەیەک سزای نوێوە، کە دەکرێت ئەو دەوڵەت، کۆمپانیا و دامەزراوە داراییانەش بگرێتەوە کە بەردەوامن لە مامەڵەکردن لەگەڵ تاران؛ ئەمەش لە هەوڵێکدا بۆ شکاندنی بنبەستی ململانێی نێوان هەردوولا دوای تێپەڕبوونی نزیکەی شەش مانگ.
دۆناڵد ترەمپ هەڕەشەی ڕاگەیاندنی "ڕۆژێکی یەکلاکەرەوەی ئابووری" کردووە و هۆشداری داوە کە هەر وڵاتێک بەردەوام بێت لە مامەڵەکردن لەگەڵ ئێران، ڕووبەڕووی لێکەوتەی ئابووریی "زۆر گەورە" دەبێتەوە، ئەمەش لە کاتێکدایە کە دەرفەتەکانی یەکلاکردنەوەی سەربازی یان گەیشتن بە ڕێککەوتنێکی دیپلۆماسی لە پاشەکشەدایە.
لەلایەکی دیکەوە، سکۆت بێسێنت، وەزیری گەنجینەی ئەمریکا ڕایگەیاند کە لە ٢٤ی ئەم مانگەدا لە ڕێگەی کۆنگرەیەکی ڕۆژنامەوانییەوە وردەکاریی ڕێکارە نوێیەکان ئاشکرا دەکات و جەختی کردەوە کە واشنتن ئامادەیە ڕێکار بەرامبەر هەر وڵاتێک بگرێتەبەر، هاوپەیمان بێت یان نەیار، ئەگەر هاوکاریی ئابووریی ئێران بکات. ئاماژەی بەوەش کرد کە ڕێکارەکان پرۆسەکانی گواستنەوەی پارە، کڕینی نەوتی ئێران و هاتووچۆی دەریایی سەر بە تاران دەکەنە ئامانج و ئەمریکا تەواوی تواناکانی بۆ سەپاندنی ئەو سزایانە بەکاردەهێنێت.
هاوکات، جەی دی ڤانس، جێگری سەرۆکی ئەمریکا، ئەم سزایانەی وەک قۆناغێکی نوێی ململانێکە وەسف کرد و ڕایگەیاند کە گوشاری ئابووری کاریگەرترین ئامرازی بەردەستی واشنتنە بۆ بەدیهێنانی ئامانجەکانی. پێشتریش واشنتن پرۆسەی "تووڕەیی ئابووری" دەستپێکردبوو کە سزای دارایی و گەمارۆدانی بەندەرەکانی ئێرانی لەخۆدەگرت.
چاودێران پێیان وایە کە ئەم ڕێکارە نوێیانە زیاتر پشت بە سزای لاوەکی دەبەستن لە ڕێگەی بەئامانجگرتنی ئەو دەوڵەت و دامەزراوە داراییانەی مامەڵە لەگەڵ ئێران دەکەن و هاوکات پشت بە دۆلار و سیستەمی دارایی ئەمریکا دەبەستن. لە بەرامبەردا، پسپۆڕان ئاماژە بەوە دەکەن کە ئێران ئەزموونێکی زۆری لە دەربازبوون لە سزاکان هەیە، لە ڕێگەی بەکارهێنانی کاناڵە داراییە نائاساییەکان و کەشتییەکانی "گەلی سێبەر" بۆ گواستنەوەی نەوت، هاوکات سەرکەوتنی ئەم هەڵمەتەی ئەمریکاش بە پلەی یەکەم پەیوەستە بە هەڵوێستی وڵاتانی وەک چین و هاوپەیمانانی دیکەی واشنتنەوە.