ئەمریکا هۆشداری توند بە ئێران دەدات

ئەمڕۆ پێنجشەم 29ی تشرینی یەکەمی 2026، وەزارەتی گەنجینەی ئەمەریکا ڕای گەیاند کە شەڕی واشنتن دژی گەلی ئێران نییە، بەڵکو دژی سیستەمی فەرمانڕەوای ئەو وڵاتەیە، هاوکات دووپاتی کردەوە کە فشارەکانیان بۆ سەر تاران بەردەوام دەبن تا ئەو کاتەی سیستەمەکە خۆی بەدەستەوە دەدات و هەناردەی نەوتیشیان بەتەواوی ڕاگرتووە.
لە لێدوانێکی ڕۆژنامەوانیدا، ئێرین براون بریکاری وەزارەتی گەنجینەی ئەمەریکا بۆ کاروباری نێودەوڵەتی گوتی، "گەمارۆکان کاریگەرن و ئێران لە ڕووی ئابوورییەوە پەراوێز خراوە، ئامانجمان پەراوێزخستنی ئێرانە لە سیستەمی دارایی جیهانی و سەرکەوتوو بووین لە ڕێگریکردن لە تاران بۆ خۆدزینەوە لە سزاکان".
زیاتر گوتی، "سزاکانی سەر ئێران کاریگەریی خۆیان سەلماندووە و تاران هەوڵ دەدات سەروەت و سامانەکەی بۆ دەرەوەی چوارچێوەی سزاکان بگوازێتەوە، هیچ بژاردەیەک لە بەردەم ئێراندا نییە جگە لە ڕاگرتنی کارەکانی بۆ تێکدانی ئاسایشی ناوچەکە".
ئەوە لە کاتێکدایە کە دوێنێ چوارشەم، سکۆت بێسێنت وەزیری گەنجینەی ئەمەریکا ڕای گەیاندبوو کە پرۆسەی پەراوێزخستنی ئابووریی ئێران سەرکەوتنی بەدەست هێناوە. ئاماژەی بەوەیش کردبوو، ئێران توانای دەستکەوتنی دۆلاری نییە و پارەدارکردنی بریکارەکانیشی لە کەمبوونەوەدایە.
وەزیری گەنجینە دووپاتی کردەوە، بۆ یەکەم جار لەو کاتەوەی ئێران دەستی بە بەرهەمهێنانی نەوت کردووە، هیچ کەشتییەکی نەوتی ئەو وڵاتە لە دەریادا نییە.
لە کۆتاییدا ئاماژەی بۆ ئەوەیش کرد، پرۆسەی پەراوێزخستنی ئابووری کە ئەمەریکا لە 24ی ئابی ڕابردوودا دەستی پێ کردووە، کار دەکات بۆ بڕینی شادەماری نەوتی سیستەمی ئێران و بێبەشکردنی لەو سەرچاوانەی کە بەکاری دەهێنێت بۆ پارەدارکردنی گرووپە چەکدارەکان، بەرنامەکانی چەکی ئەتۆمی و شێوازی ژیانی پڕ لە خەرجیی نوخبەی هێزە چەکدارەکانی ئەو وڵاتە.