ئەمریکا پشتیوانی هەرێمی کوردستانێکی بەهێز دەکات

وتەبێژی وەزارەتی دەرەوە پشتیوانی هەرێمی کوردستانێکی بەهێز دەکات. 
وتەبێژەکەی وەزارەتی دەرەوەی ئەمریکا جەختی لەوە کردەوە، واشنتن پشتیوانی لە هەرێمی کوردستانێکی بەهێز و خۆڕاگر لە عێراقدا دەکات، کە هەمیشە وەک کۆڵەکەیەکی بنەڕەتی لە پەیوەندییە فراوانەکانی نێوان ئەمریکا و عێراقدا دەمێنێتەوە.
لە بەشێکی دیکەی لێدوانەکەیدا، ئەو وتەبێژەی وەزارەتی دەرەوە ئاماژەی بە پابەندبوونی درێژخایەنی واشنتن بە ئاییندەی عێراقەوە کرد و رایگەیاند، ئەمریکا پابەندە بە هاوبەشەکانی لە سەرتاسەری عێراقدا؛ ئەو هاوبەشانەی کە کار بۆ بنیاتنانی وڵاتێکی خاوەن سەروەریی راستەقینە، سەقامگیر و خۆشگوزەران دەکەن.
هاوکات وتەبێژەکەی وەزارەتی دەرەوەی ئەمریکا پەیامێکی ئاراستەی سەرجەم هێز و لایەنە سیاسییەکان کرد و گوتی: ئێمە هانی سەرجەم لایەنەکان دەدەین بە خێرایی و بە شێوازێکی بونیاتنەرانە کار لەسەر ئەو پرسانە بکەن کە دەبنە مایەی بەهێزکردن و پتەوکردنی دامەزراوەکانی دەوڵەت لە عێراقدا، بە شێوەیەک کە عێراق بتوانێت وەک هاوبەشێکی باوەڕپێکراو و جێی متمانە بۆ  ئەمریکا و تەواوی ناوچەکە رۆڵ بگێڕێت.