بەپێی ڕاپۆرتە ڕۆژنامەوانییەکان، دوای شکستی پارتی کۆمارییەکان لە هەڵبژاردنەکانی ناوەڕاستی خول و کۆنتڕۆڵکردنی کۆنگرێس لەلایەن دیموکراتەکانەوە، پێگەی سیاسیی دۆناڵد ترەمپ، سەرۆکی ئەمریکا ڕووبەڕووی ئاڵنگاری بووەتەوە. لە ئێستادا سەرۆکی ئەمریکا لە بەرامبەر سێ بژاردەی ئاڵۆزدایە: نوێکردنەوەی هێرشە سەربازییەکان، گەڕانەوە بۆ دانوستان، یان پاراستنی دۆخی ئێستای "نە شەڕ و نە ئاشتی".
بەربەستەکانی بەردەم بژاردەکان:
نوێکردنەوەی شەڕ: دەکرێت ببێتە هۆی شەرمەزارییەکی زیاتری سیاسی بۆ ترەمپ و پارتەکەی، بەتایبەت دوای گوشاری بەشێک لە کۆمارییەکان بۆ کۆتاییهێنان بە شەڕەکە.
گەڕانەوە بۆ دانوستان: بەپێی زانیارییەکان، هەوڵەکانی قەتەر بۆ نێوەندگیری ئاستەنگیان لەبەردەمدایە، ئەوەش بەهۆی سووربوونی تاران لەسەر مەرجەکانی.
وەستانی دۆخی ئێستا: بەردەوامبوونی سیاسەتی "نە شەڕ، نە ئاشتی" بە مەترسیدار دادەنرێت، چونکە وەستانی بارودۆخەکە دەبێتە هۆی ئەوەی نرخی نەوت لە ئاستە بەرزەکەیدا بمێنێتەوە.
لەگەڵ ئەوەشدا، بەرپرسانی وەک جۆن ڕاتکلیف (بەڕێوەبەری CIA) و سکۆت بیسەنت (وەزیری گەنجینە) داوا دەکەن ترەمپ سیاسەتی گەمارۆی دەریایی و فشاری ئابووری بەردەوام بکات.
کاردانەوەی ئێران و ئامادەکاری سەربازی:
لەلایەکی دیکەوە، موحسین ڕەزایی، سکرتێری ئەنجومەنی باڵای ئاسایشی نەتەوەیی ئێران رایگەیاندووە کە وڵاتەکەی شکستێکی ستراتیژی و سیاسی بەسەر ترەمپدا هێناوە. شارەزایان بەپێی ئاکسیۆس هۆشداری دەدەن کە ڕەنگە تاران لاوازی سیاسی ترەمپ بە لاوازی سەربازی لێکبداتەوە. لە بەرامبەردا، بەرپرسانی ئەمریکا پشتڕاستیان کردووەتەوە کە سوپای وڵاتەکەیان ئامادەکارییەکان بۆ ئەگەری دەستپێکردنەوەی ئۆپەراسیۆنی سەربازی بەرفراوان کۆتایی پێهێناوە.
#Kurdistanpress
وەڵام بدەوه