وەزارەتی دارایی و ئابووریی حکومەتی هەرێمی کوردستان، لیستی مووچەی مانگی چوار و تەرازووی پێداچوونەوە (میزان موراجەعە) و داهاتی ناوخۆی مانگی سێی ئامادە کردووە و سبەی ڕەوانەی بەغدای دەکات، دووسبەیش شاندێکی تەکنیکی بۆ وەڵامدانەوەی پرسیار و تێبینییەکان دەچێتە بەغدا.
وەزارەتی دارایی هەرێمی کوردستان هەوڵەکانی بۆ جێبەجێکردنی پابەندییەکانی خۆی بە ڕێککەوتنی لەگەڵ بەغدا بۆ خەرجکردنی مووچە چڕکردووەتەوە، بۆ مووچەی مانگی چوار ئێستا لیستی مووچە ئامادەیە و داهاتی ناوخۆش کۆکراوەتەوە و تەرازووی پێداچوونەوەی مانگی سێش ئامادەیە، کە ئەمانە ئەو سێ ئەرکەن دەبێت مانگانە جێبەجێیان بکات.
سەرچاوەیەک لە وەزارەتی دارایی و ئابووریی حکومەتی هەرێمی کوردستان ڕاگەیاند: "ئێستا سەرقاڵی ئیجرائاتی حسابین لەگەڵ بانکەکاندا بۆ داهاتی ناوخۆ، چاوەڕوانی ئەنجامی بانکەکانین، چونکە پارەکە ئامادەیە و نزیکەی 49 ملیار دینارە".
سبەی دووشەممە لیستی مووچە و داهاتی ناوخۆ و میزان موراجەعە ڕەوانەی بەغدا دەکرێن و دووسبەیش شاندێکی تەکنیکی دەچێتە بەغدا بۆ ئەوەی ئەگەر تێبینی یان پرسیارێک هەبێت ڕوونکردنەوەی لەسەر بدەن.
وەڵام بدەوه