گرووپی حزبوڵای عێراقی، هەڕەشە لە ئەمریكا و ئیسرائیل دەكات و دەڵێت: "هەر هێرشێك بكرێتە سەر عێراق و ئێران، 12 ملیۆن بەرمیل نەوتی ڕۆژانە بۆ جیهان ڕادەگیرێت."
ئەمڕۆ پێنجشەممە، 10ی تشرینی یەكەمی 2024، گرووپی حزبوڵای عێراقی ڕایگەیاندووە: "ئەگەر بێت و هێرشی ئیسرائیل بۆ سەر عێراق و ئێران بكرێت، شادەماری گواستنەوەی وزە بۆ جیهان لەلایەن بەرەی ئێمەوە لە ناوچەكەدا ڕادەگیرێت."
ئەبوو عەسكەری، گوتەبێژی سەربازیی كەتیبەكانی حزبوڵا، ڕایگەیاندووە: "جەخت لەوە دەكەینەوە، هەر شوێنێك لە عێراق بكرێتە ئامانج، یان هەر پێگەیەكی ئێران بە ئامانج بگیرێت، وەڵامی حزبوڵا بۆ سەر ئیسرائیل و بنكە و پێگەكانی ئەمریكا لە عێراق و ناوچەكەدا زۆر توند دەبێت."
دەشڵێت: "دەست بە شەڕی وزە ناكەین، بەڵام ئەگەر هێرش بكەن، جیهان 12 ملیۆن بەرمیلی ڕۆژانەی نەوت لەدەست دەدات، ئەوەش بە هەوڵی برایانی یەمەنیمان لە گەرووی بابولمەندەب و برایانی ئێرانیمان لە گەرووی هورمز."
ئەم هەڕەشانەی حزبوڵای عێراق لە كاتێكدایە كە ناوچەكە بە دۆخێكی دژواردا تێپەڕ دەبێت و سوپای ئیسرائیل هێرشی زەمینی و ئاسمانی كردووەتە سەر ڕێكخراوی حزبوڵا لە باشووری لوبنان، كۆماری ئیسلامیی ئێرانیش هەفتەی پێشوو سەدان مووشەكی ئاراستەی ئیسرائیل كرد.
وەڵام بدەوه