دەسپێشخەرییەک لە عێراقەوە

وەزیری دەرەوەی عێراق دەستپێشخەرییەک بۆ ڕێککەوتنی ئەمەریكا و ئێران دەخاتە ڕوو
لە هەوڵێکدا بۆ دوورخستنەوەی ناوچەکە لە مەترسییەکانی سەرهەڵدانەوەی شەڕ و ئاڵۆزییەکان، وەزیری دەرەوەی عێراق دەستپێشخەرییەکی نوێی خستووەتە ڕوو بۆ پێکهێنانی لیژنەیەکی وەزاریی ناوچەیی، بە مەبەستی کردنەوەی کەناڵێکی دانوستانی ڕاستەوخۆ لەنێوان واشنتن و تاران و گەیشتن بە لێکتێگەیشتنی ئاشتییانە.
بەپێی راپۆرتێكی رۆژنامەی (ئەلعەرەب)، عێراق دەستپێشخەرییەکی خستووەتە ڕوو بۆ گواستنەوەی نێوەندگیریی ئەمەریكا و ئێران لە کەناڵەکانی پەیوەندیکردنەوە بۆ جووڵەیەکی ناوچەیی ڕاستەوخۆ بەرەو واشنتن و تاران.
بەپێی زانیاریەكانی رۆژنامەكە، لەمیانی پەیوەندییەکی تەلەفۆنیدا کە ئێوارەی ڕۆژی هەینی لەگەڵ عەباس عێراقچی، وەزیری دەرەوەی ئێران ئەنجامی داوە، فوئاد حوسێن، وەزیری دەرەوەی عێراق پێشنیازی پێکهێنانی لیژنەیەکی کردووە کە وەزیرانی دەرەوەی چەند وڵاتێکی ناوچەکە لەخۆ بگرێت، بۆ ئەوەی سەردانی تاران و واشنتن بکەن، بە مەبەستی تاوتوێکردنی ڕێگاکانی گەیشتن بە لێکتێگەیشتنی ئاشتییانە.
بەگوێرەی ڕاگەیەندراوێکی وەزارەتی دەرەوەی عێراق، فوئاد حوسێن گوێی لە خستنەڕوویەکی وردی تێڕوانینی ئێران گرتووە سەبارەت بە ڕەخساندنی زەمینە بۆ دەستپێکردنەوەی دانوستانەکان. عێراقچی ڕایگەیاندووە کە ئەم تێڕوانینە پێش هەڵبژاردنەکانی نیوەی خولی ئەمەریكا خراوەتە ڕوو و دیاریکردنی وادەی دەستپێکردنی پرۆسەی دانوستان، کردنەوەی گەرووی هورمز و گەڕانەوە بۆ ئەو خاڵانەی لە لێکتێگەیشتنەکانی پاکستاندا هاتوون لەخۆ دەگرێت، سەرباری زیادکردنی چەند دۆسییەیەک کە پەیوەندییان بە بەرنامە ئەتۆمییەکەی ئێرانەوە هەیە.
ئەم خستنەڕووە ئاشکرای دەکات کە تاران وەک هەنگاوێکی جیاکراوە لە دۆسییە سەربازی و ستراتیژییە هەڵپەسێردراوەکان مامەڵە لەگەڵ دەستپێکردنەوەی دانوستانەکاندا ناکات، بەڵکوو دەیبەستێتەوە بە کۆمەڵێک پرسەوە کە وەک کارتی فشاری سەرەکی لە پەیوەندییەکانیدا لەگەڵ واشنتن نوێنەرایەتیی دەکەن. کردنەوەی گەرووی هورمز پەیوەستە بە حیساباتەکانی ئاسایشی وزە و بازرگانیی نێودەوڵەتییەوە، لەکاتێکدا دۆسییەی ئەتۆمی وەک یەکێک لە دیارترین سەرچاوەکانی ناکۆکیی نێوان هەردوو لایەن دەمێنێتەوە.
لەبەرامبەردا، ڕاگەیەندراوەکەی وەزارەتی دەرەوەی عێراق وردەکاریی زیاتری ئاشکرا نەکردووە سەبارەت بەو وڵاتانەی کە دەکرێت بەشداریی لەو لێژنە پێشنیازکراوەدا بکەن. هەروەها ڕوون نەبووەتەوە کە ئایا دەستپێشخەرییەکە ڕەزامەندیی ئێران یان ئەمەریكای بەدەست هێناوە یان هێشتا لە قۆناغی خستنەڕووی بیرۆکەکان و پێوانەکردنی هەڵوێستەکاندایە. 
سەرەڕای ئەوەش، پێشنیازی چوونی وەزیرانی دەرەوەی ناوچەکە بۆ واشنتن و تاران، دەلالەتێکی سیاسیی هەڵگرتووە کە لە پەیوەندییە نەریتییەکان تێدەپەڕێت.
دەستپێشخەرییەکەی عێراق جیاواز نییە لە ترسەکانی بەغدا لە دەرهاوێشتەکانی هەر ڕووبەڕووبوونەوەیەکی نوێ لەسەر ناوخۆی عێراق. پێشتر فوئاد حوسێن، لەمیانی چاوپێکەوتنێکی تەلەڤزیۆنیدا هۆشداری دا لە لێکەوتەکانی تێوەگلانی دووبارەی عێراق لە شەڕەکەدا و پێی وابوو کە ئەوە وڵاتەکە دەخاتە ناو تونێلێکی تاریکەوە. ئەم لێدوانانە ڕەنگدانەوەی درکپێکردنێکی عێراقین بە هەستیاریی پێگەی وڵاتەکە، بەتایبەتی کە بەغدا دەیەوێت پەیوەندییە ستراتیژییەکانی لەگەڵ ئەمەریكا بپارێزێت و لە هەمان کاتیشدا خۆی بەدوور بگرێت لە گۆڕینی خاکەکەی بۆ گۆڕەپانی یەکلاکردنەوەی ململانێکان.
بەڵام سەرکەوتنی دەستپێشخەرییە پێشنیازکراوەکە بەستراوەتەوە بە ئامادەیی هەردوو لایەنی ئەمەریكی و ئێرانی بۆ گواستنەوە لە ئاڵوگۆڕی پەیام و فشارەکانەوە بۆ دانوستانی کرداری. بۆ بەغدا، گرنگیی دەستپێشخەرییەکە تەنیا لە بەدەستهێنانی پێشکەوتنێکی دیپلۆماسی لەنێوان واشنتن و تاراندا قەتیس نابێت، بەڵکوو پاراستنی عێراق لە لێکەوتەکانی ڕووبەڕووبوونەوەیەک کە ڕەنگە سنوورەکانی تێپەڕێنێت، لەخۆ دەگرێت، بەو هیوایەی حکوومەت بتوانێت ترسەکانی لە فراوانبوونی شەڕەکە بگۆڕێت بۆ دەرفەتێک بۆ جووڵەی دیپلۆماسی و ڕێگریی لە سەرهەڵدانەوەی گرژییەکان بکات.