فه‌رمانده‌یی ناوه‌ندیی ئه‌مریكا (سێنتكۆم) ڕایگەیاند، لە ئۆپەڕاسیۆنێكی هاوبەشدا لەگەڵ عێراق ژمارەیەك پێگەی داعشیان لە ناوەڕاستی ئەو وڵاتە بە ئامانج گرتوە و لانیكەم حەوت چەكداری ئەو ڕێكخراوە كوژراون، هەروەها دەشڵێت، "لەكاتی هاوكاریكردنی هێزەكانی عێراق، دو سەربازی ئەمریكی برینداربون و دۆخی تەندروستیان جێگیرە".
فه‌رمانده‌یی ناوه‌ندیی ئه‌مریكا لە ڕاگەیەندراوێكدا بڵاویكردەوە، لە بەرەبەیانی 22ی (تشرینی یەکەم/10)، هێزە ئەمنییەکانی عێراق و هاوپەیمانان وەک بەشێک لە هێزی ئەرکی هاوبەشی یەکگرتو، هێرشیان بۆ سەر چەندین شوێنی داعش لە ناوەڕاستی عێراق ئەنجامدا، كە تێدا ژمارەیەك سەرکردەیەکی باڵای داعش بە ئامانج گیران و لانیکەم حەوت چەكداری داعش كوژران.
ئاماژەی بەوەشكرد، لە میانی ئۆپەراسیۆنەکەدا، دو کارمەندی سەربازی ئەمریکی بریندار بون لەکاتێکدا هاوکاری هێزەکانی عێراقیان دەکرد، بەڵام باری تەندروستیان جێگیرە.
سێنتیكۆم لەبارەی گرژیەكانی ناوچەكەوە باسی لەوەكردوە، "هێزەکانی ئەمریکا و هاوپەیمانان لە ئاستێکی بەرزی ئامادەباشیدان، هەڵوێستیان هەیە بۆ بەرگریکردن لە بەرژەوەندییەکانی ئەمریکا و بەرژەوەندییەکانی هاوپەیمانان و هاوبەشەکانمان لە ناوچەکەدا".
وەڵام بدەوه