وەزیری ناوخۆی حكوومەتی هەرێمی كوردستان، رەتی كردەوە بە بڕیارێكی وەزارەتەكەی ژمارەی تاكسی لە كوردستان زیاد بكرێت. ئاماژەی بۆ ئەوە كرد ئەو بابەتە زیاد لە پێویست گەورە كراوە.
ئەمڕۆ شەممە 17ی ئایار، رێبەر ئەحمەد وەزیری ناوخۆی حكوومەتی هەرێمی كوردستان، بۆ رۆژنامەنووسان گوتی، بڕیارەكەی وەزارەتی ناوخۆ دەرفەت دەداتە شۆفێران بۆ ئەوەی ئۆتۆمبێلەكانیان نوێ بكەنەوە، ئەگەرنا ژمارەی تاكسی كوردستان زیاد نابێت.
ڕوونیشی كردەوە، چەندان ئیمتیاز دراوەتە خاوەنی تاكسییەكان بۆ ئەوەی سوودی لێ وەربگرن، دواجار بڕیاری گۆڕانكاری لە تاكسییەكەیان لە دەستی خۆیاندایە.
لەبارەی كۆبوونەوەی پارتی و یەكێتی، وەزیری ناوخۆی حكوومەتی هەرێمی كوردستان ئاماژەی بۆ ئەوە كرد، دواجار كۆبوونەوەكەی دوكان بوو كرا، گرنگ ئەنجامەكەیەتی پێویستە باس بكرێت نەك هەندێك بابەتی لاوەكی كە لە راگەیاندنەكانەوە دەخرێنە ڕوو، بۆیە "ئومێد دەكەین لە داهاتوویەكی نزیكدا كۆبوونەوەكانی پارتی و یەكێتی بۆ پێكهێنانی حكوومەت دەست پێ بكەنەوە".
لێدوانی وەزیری ناوخۆی حكوومەتی هەرێمی كوردستان لە كاتێكدایە كە ئێستە هەر كەسێك تاكسییەكەی بكات بە هایبرێد، چەندان ئیمتیازی دەدرێتی و ژمارەیەكەیشی دەبێتە خۆڕایی.
وەڵام بدەوه