دەستەی گشتیی کەشناسی و بوومەلەرزەزانیی عێراق، ئەمڕۆ پێنجشەم چواری ئەیلوول، ڕای گەیاند پێشبینی دەکرێت پێش ناوەڕاستی ئەم مانگە نزمەپەستانێکی ئەوروپی کاریگەریی لەسەر کەشوهەوای وڵات هەبێت، کە دەبێتە هۆی دابەزینی پلەکانی گەرما و بارانبارینی پچڕپچڕ لە هەندێک لە شارەکانی باکوور.
بەپێی ڕاگەیەنراوێکی دەستەکە کە دەست "وشە" کەوتووە، "بەشی پێشبینیی کەشوهەوا چاودێریی گۆڕانکاریی نزمەپەستانێک دەکات کە لە کیشوەری ئەوروپاوە دێت".
زانیارییە سەرەتاییەکان ئاماژە بەوە دەکەن کە دابەزینێکی پلەکانی گەرما زۆربەی شارەکان دەگرێتەوە، بەتایبەتی لە ناوچەکانی ناوەڕاست و باکوور "هەرێمی كوردستان" . هەروەها، ئەگەری بارینی بارانێکی سووک و پچڕپچڕ لە هەندێک لە شارەکانی باکوور هەیە، لەگەڵ ناجێگیری لە ئاراستەی بادا و ئەگەری بەرزبوونەوەی تۆز و خۆڵ.
دەستەکە ئاماژەی بەوەیش کردووە کە ئەم پێشبینییانە لەوانەیە بگۆڕدرێن، چونکە پشت بە ئاراستەی ڕاستەقینەی جووڵەی نزمەپەستانەکە و هێزی ئەو بەرزەپەستانە دەبەستێت کە لە ئێستادا لەسەر ناوچەکەیە.
لە کۆتایی ڕاگەیەنراوەکەدا هاتووە، ئەم نزمەپەستانە بە یەکەم دیاردەی کەشوهەوای کاریگەر دادەنرێت کە دوای هاوینێکی وشک و گەرم ڕوو لە وڵات دەکات.
وەڵام بدەوه