کاتی ئاساییکردنەوەی کارەبا راگەیاندرا.. دوای کۆبوونەوەی هەردوو وەزارەتی سامانە سرووشتییەکانی و وەزارەتی کارەبا لەبارەی ئاسایبوونەوەی دۆخی پێدانی کارەبای نیشتمانی، سەرچاوەی لە پڕۆژەی ڕووناکی ڕاگەیاند: لە سبەی یەکشەممەوە هەنگاو بە هەنگاو کارەبا ئاسایی دەبێتەوە.
بە هۆی هێرشی تیرۆریستی بۆ سەر کێڵگەی غازی کۆرمۆر و تەقاندنەوەی یەکێک لە کۆگاکانی هەڵگرتنی سووتەمەنی، ماوەی چەند ڕۆژێکە هاووڵاتییانی هەرێمی کوردستان ڕووبەڕووی کەمبوونەوەی پێدانی کارەبای نیشتمانی بوونەتەوە و ئێستا هەوڵدەدرێت بۆ ئاسایکردنەوەی دۆخەکە.
ئێوارەی ئەمڕۆ هەردوو وەزارەتی کارەبا و سامانە سرووشتییەکان لەبارەی کەمبوونەوەی کارەبای نیشتمانی و چارەسەربوونی گرفتەکان کۆبوونەوە و دواتر لە ڕاگەیێنراوێکدا ڕایانگەیاند: زۆربەی كێشە تەكنیکییەكانی کۆرمۆر چارەسەركراون بۆ ئەوەی بەزووترین کات دەست بە پرۆسەی بەرهەمهێنانی غازی سرووشتی بکرێتەوە.
- ئێستا تەنیا ئەوە ماوە لە کیڵگەی کۆرمۆر دەست بە بەرهەمهێنانی غازی سروشتی و گواستنەوەی بکرێت بۆ وێستگەکانی کارەبا.
سەرچاوەیەک لە پڕۆژەی ڕووناکی ڕاگەیاند: دانەغاز و وەزارەتی کارەبا ئەمڕۆ کۆبوونەتەوە، کێشەی بەرهەمهێنانی غازی سروشتی چارەسەر کراوە، لە سبەی یەکشەممەوە کارەبا هەنگاو بە هەنگاو ئاسایی دەبێتەوە، چەند ڕۆژێکی پێدەچێت تاوەکو دەبێتەوە 24 کاتژمێری.
سەرچاوەیەکی ئاگادار ڕاگەیاند، هەرکاتێک غاز بۆ وێستگەکانی کارەبا ڕەوانە بکرێت، لە ماوەی یەک کاتژمێر غازەکە دەگاتەوە وێستگەکان و دەست بە بەرهەمهێنانی کارەبا دەکرێت، لە ماوەی 24 کاتژمێریشدا دۆخی بەرهەمهێنانی کارەبا ئاسایی دەبێتەوە و دەگەڕێتەوە دۆخی پێش هێرشەکە.
وەڵام بدەوه