ئەمڕۆ شەممە، 6ی کانوونی یەکەمی 2025، ئامینە زکری، ئەندامی مەکتەبی سیاسی پارتی دیموکراتی کوردستان، لە کۆنفرانسی نێودەوڵەتی ئاشتی و کۆمەڵگەی دیموکراسی لە ئیستانبوڵ، پەیامی سەرۆک بارزانی، لەبارەی پرۆسەی نوێی ئاشتی لە تورکیا و باکووری کوردستان، خوێندەوە.
سەرۆک بارزانی، لە پەیامەکەیدا جەختی کردووەتەوە “هەردەم دیالۆگ و لێکگەیشتن باشترە لە شەڕ و ئاڵۆزی و لە گفتوگۆ و ئاشتیدا مرۆڤایەتی براوە دەبێت.” هەروەها ئاماژەی بەوە کرد “ناوچەکە بە قۆناغێکی هەستیاردا تێ دەپەڕێت و پێویستە هەموو لایەک وانە لە هەڵەکانی رابردوو وەربگرن.”
سەرۆک بارزانی، پشتیوانی تەواوی خۆی بۆ پرۆسەی ئاشتی لە تورکیا دەربڕی و گوتی: پڕ بە دڵ دەستخۆشی لە حکومەتی تورکیا و بەڕێز ئەردۆغان و بەڕێز ئۆجەلان دەکەم کە هەلیان بۆ پرۆسەی ئاشتی و دانوستاندن رەخساندووە.
سەرۆک بارزانی، لە کۆتایی پەیامەکەیدا دووپاتی کردەوە، پشتیوانی هەر هەوڵێک دەکات کە خزمەت بە پرۆسەی ئاشتی و بەهێزکردنی برایەتی و پێکەوەژیانی گەلانی ناوچەکە بکات.
کۆنفرانسی نێودەوڵەتی ئاشتی و کۆمەڵگەی دیموکراسی، لەلایەن دەم پارتییەوە رێکخراوە، ئەمڕۆ دەستی پێ کردووە و تا سبەینێ، یەکشەممە، 7ی کانوونی یەکەم، بەردەوام دەبێت.
بەشێک لە میوانان بیانین و هەڵگری خەڵاتی نۆبڵی ئاشتین و هەروەها ئیلهام ئەحمەد، هاوسەرۆکی بەرپرسی پەیوەندییەکانی دەرەوەی بەڕێوەبەرایەتی خۆسەر بە شێوەیەکی ئۆنلاین پەیامەکەی ئاراستەی بەشدار بووان کرد.
وەڵام بدەوه