وەزارەتی ناوخۆی عێراق نوێترین ئامارەكانی پڕۆسەی تۆماركردنی چەكی لە سەرانسەری وڵاتەكەو ڕاگەیاند و هۆشداری توندیش دەداتە ئەو كەسانەی چەكەكانیان بە نایاسایی دەهێڵنەوە.
عەباس بەهادلی گوتەبێژی وەزارەتی ناوخۆی عێراق ڕای گەیاند، لە چوارچێوەی هەوڵەكانی حكوومەت بۆ كۆنترۆڵكردنی چەك لە دەستی دەوڵەتدا، تاوەكو ئێستە پێنج ملیۆن و 800 هەزار چەك بە فەرمی تۆماركراون.
ئاماژەی بەوەش كرد كە پڕۆسەكە بەردەوامە و زیاتر لە 250 هەزار داواكاری نوێ بۆ تۆماركردن پێشكەش كراون.
بەپێی گوتەكانی بەهادلی، وەزارەتەكە 864 بنكەی تایبەتی بۆ ئەم مەبەستە كردووەتەوە و تاوەكو ئێستە پێداچوونەوەی ورد بۆ 310 هەزار داواكاری كراوە.
گوتەبێژی وەزارەتی ناوخۆ هۆشداری دا كە هەر كەسێك پابەندی تۆماركردن نەبێت، ڕووبەڕووی لێپرسینەوەی یاسایی و دەستبەسەرداگرتنی چەكەكەی دەبێتەوە. هەروەها گوتی، كە پڕۆسەی تۆماركردنی چەك تاوەكو ڕێكەوتی 31ـی كانوونی یەكەمی 2026 بەردەوام دەبێت.
وەڵام بدەوه