لەقکردنی پێگەی هەرێم

لەقکردنی پێگەی هەرێم
ئامادەیی پارتی لە بەغدا بە درێژایی ساڵانی رابردوو زامنی مانەوەی قەوارەیی هەرێمی دەستووریی کوردستان و پاراستنی سەنگ و قورسایی کورد بووە. 
پێداگری پارتی وەک حزبێکی خاوەن پێگەیەکی جەماوەریی گەورە لە سەر جێ بە جێ کردنی دەستوورو بەرەنگاربوونەوەی هەوڵە نادەستووریەکانی بەغدا بە مەبەستی سەپاندنی باڵادەستی و بچوک کردنەوەی هەرێم، حەقیقەتی ئەو پەیامەیە پارتی چەندین دەیەیە هەڵیگرتووەو بەرگری لێکردووە. 
جگەلەمەش پارتی هەمیشە هەوڵیداوە حزب و لایەنە سیاسیە کوردستانیەکان لە بەغدا بەرامبەر بە پرسە نیشتیمانی و نەتەوەییەکان یەکهەڵوێست و هاوڕاو هاوبۆچوون بن و گەڵاڵەکردنی رێککەونێکی یەکانگیری نیشتیمانی و یەک بەرەیی بۆ پرسە چارەنوسسازە نەتەوەیی و نیشتیمانیەکانی بە پێویست زانیوە. 
بەڵام ئەوەی  لە رابردووو ئێستادا بووە بە ئاڵنگاریەکی گەورە لەبەردەم دروست کردنی کۆدەنگی و کۆگیریە نیشتیمانیەکان، ئەو کەلێن و مەودایە بووە یەکێتی خستوویەتە ناو ڕیزەکانی کورد و گرتبە بەری ئاڕاستەیەکی تاکڕەوی لە لایەن ئەم حزبە بووە بە کۆسپێکی گەورە لەبەردەم پرۆژە نیشتیمانیەکانەوە. 
پەیوەست بە دۆخی چەقبەستووی هەرێم و ئەو دۆخە ناسەقامگیرە سیاسیەی حاڵی حازر باڵی بەسەر پرۆسەی سیاسیدا کێشاوە، یەکێتی و سەرکردایەتیەکەی زیاد لە قەوارەی جەماوەری خۆیان داواو خواستیان خستۆتە بەردەم پارتیەوە. 
سەرکردایەتی یەکێتی  لە مانگەکانی رابردوو سەلماندیان ئەوان هیچ بە تەنگ  سەقامگیری و بەرەوپێشەوەبردنی پرۆسەی سیاسی و یەکڕیزی نیشتیمانیەوە نین و ئامادەن بۆ دەستخستنی دەسکەوتە شەخسی و حزبیەکان، سازش لەسەر خاک و پیرۆزیەکانی گەلەوە بکەن و ئەمیش بە دەسکەوت و نیشتیمان پەروەریەوە بە حزبە سیاسیە کوردستانیەکان بفرۆشنەوە.