هەولێر - بریکاری پێشووتری وەزارەتی دارایی عێراق مەرجی گەیشتنی مووچەی فەرمانبەرانی هەرێمی کوردستان بۆ پێش جەژنی قوربان ئاشکرا دەکات و دەڵێت، بابەتەکە بەندە بە هەوڵ و فشاری نوێنەرانی کوردەوە لە بەغدا.
فازڵ نەبی، بریکاری پێشووتری وەزارەتی دارایی عێراق لە لێدوانێکدا ڕایگەیاند؛ بڕیارە حکومەتی فیدراڵی پێش هاتنی جەژنی قوربان مووچەی مووچەخۆرانی خۆی دابەش بکات. سەبارەت بە پشکی هەرێمی کوردستانیش ئاماژەی بەوە کرد کە ناردنی مووچە پێش جەژن، دەکەوێتە سەر شانی نوێنەران و بەرپرسانی کورد لە بەغدا کە تا چەند چالاک دەبن و فشاری پێویست دروست دەکەن.
لەسەر پرسە داراییە هەڵپەسێردراوەکانی دیکەش، فازڵ نەبی ڕوونیکردەوە کە هەولێر و بەغدا دەتوانن پێشوەختە لەسەر بابەتی ١٢٠ ملیار دینارەکە بگەنە ڕێککەوتن و هەرێمی کوردستان ئەو بڕە پارەیە ڕەوانەی بەغدا بکات، بۆ ئەوەی هیچ بیانوویەک نەمێنێتەوە. ناوبراو جەختی کردەوە: "ئەگەر برادەرانمان لە بەغدا چالاک بن و بتوانن فشار بکەن، بەڵێ پێش جەژن مووچەی مانگی ٥ دێت."
ئەم لێدوانانە لە کاتێکدایە کە پێشتر هەمان بەرپرسی پێشووی عێراق هۆشدارییەکی توندی دابوو و ڕایگەیاندبوو، ئەگەر بودجەی ساڵی ٢٠٢٦ پەسەند نەکرێت، ئەوا بەغدا بەنیازە هاوشێوەی ڕابردوو، مووچەی دوو مانگی ئەمساڵی فەرمانبەرانی هەرێمی کوردستان نەدات.
#kurdistanpress
وەڵام بدەوه