بارانبارین زوو دەسپێدەکاتەوە

شارەزایەکی کەشناسی پێشبینی دەکات پایزی ئەمساڵ وەرزی بارانبارین زووتر لە وادەی خۆی دەست پێ بکات و ڕێژەی بارانیش لە سەروو ئاستی ئاساییەوە بێت، ئاماژە بەوەش دەکات کە دیاردەی "ئێڵ نینۆ" لە زەریای هێمن پەرەی سەندووە و کاریگەریی گەورە لەسەر گۆڕانکارییەکانی کەشوهەوای هەرێمی کوردستان و ناوچەکە دروست دەکات.
ئاراس جەبار، شارەزای کەشناسی لە نوێترین شیکارییدا بڵاویکردووەتەوە، زستان و بەهاری ساڵی 2026 بەهۆی زۆریی ڕێژەی بەفر و بارانەوە بوونە هۆی بووژانەوەی سەرجەم سەرچاوە ئاوییەکان و پڕبوونەوەی بەنداوەکان، بەمەش مەترسییەکانی وشکەساڵی لە ناوچەکەدا کۆتاییان هات.
ڕوونیشیکردووەتەوە، لە ئێستادا دیاردەی ئێڵ نینۆ لە ناوچەکانی ڕۆژهەڵات و ناوەڕاستی زەریای هێمن لە پەرەسەندندایە و بۆ هاوین و پایزی ئەمساڵ بەهێزتر دەبێت، ئەمەش کۆمەڵێک لێکەوتە و گۆڕانکاریی گەورە لە کەشوهەوای جیهاندا دروست دەکات.
ئەو شارەزایەی کەشناسی ئاشکراشی کردووە، یەکێک لە کاریگەرییەکانی ئەو دیاردەیە لەسەر وڵاتانی ڕۆژهەڵاتی ناوەڕاست و هەرێمی کوردستان، زۆربوونی بارانبارین و زوو دەستپێکردنی وەرزی بارانە لە پایزدا، هاوکات کەشوهەوای مانگەکانی پایزیش فێنکتر و ساردتر دەبێت لە ئاستی ئاسایی خۆی.