داشکاندنی گەورە راگەیاندرا

وەزارەتی كارەبای حكوومەتی هەرێمی كوردستان ڕای دەگەیەنێت كە بڕی داشكاندنی سێ‌  ملیار دینار گەڕاندەوە بۆ هاوبەشانی ماڵان وەك بەشێك لە ڕێكارە بەردەوامەكانی ڕاستكردنەوەی پڕۆسەی پسوولەكردن.
لە چوارچێوەی هەوڵەكان بۆ كەمكردنەوەی هەڵە لە پڕۆسەی پسوولەكردن، سیستەمی نوێی پسوولەكردن نزیكەی  118 هەزار هاوبەشی ماڵانی دیاریكردووە كە بەتەواوی لە داشكاندنی سێ مانگی یەكەمی پڕۆژەی ڕووناكی سوودمەندنەبوون.
هەموو ئەو هاوبەشانەی ماڵان بڕی داشكاندنەكانیان لە پسوولەی مانگەكانی داهاتووی پڕۆژەی ڕووناكی یان قەرزی پێش پڕۆژەی ڕووناكی بۆ ئەژماردەكرێت. ئەو هاوبەشانەی خۆیان تۆماركردووە لە پڕۆژەی ڕووناكی لەرێگەی كورتەنامە ئاگەداردەكرێنەوە.
تا ئەمڕۆ، نزیكەی 5.5 ملیۆن هاووڵاتیی كە زیاترە لە 85%ی هاووڵاتییانی كوردستان كارەبای 24 سەعاتیان بۆ دابینكراوە لەڕێگای پڕۆژەی ڕووناكی.
بەپێی نرخە نوێیەكان، ٪80ی هاووڵاتیان، بەتایبەتی كەمدەرامەتان، پارەیەكی كەمتر دەدەن بە بەراورد بەو پارەیەی پێشتر دەیاندا بۆ كارەبای مۆلیدە و كارەبای نیشتمانی.
مانگی تشرینی دووەمی ساڵی 2024، مەسروور بارزانی، سەرۆكی حكوومەتی هەرێمی كوردستان، پڕۆژەی ڕووناكی ڕاگەیاند بە مەبەستی گەیاندنی كارەبای 24 سەعاتی بۆ سەرجەم ماڵ و شوێنە بازرگانییەكان تا كۆتایی ساڵی 2026. لە ئایاریش، ئەنجوومەنی وەزیرانی حكوومەتی هەرێمی كوردستان بەكۆی دەنگ بڕیاری پەسەندكردنی پڕۆژەكەی دەركرد.