نوسینگەی سەرۆک وەزیران هاتە دەنگ

نوسینگەی سەرۆكی حكوومەتی هەرێمی كوردستان و وەزارەتی سامانە سروشتییەكان، بە مەبەستی دۆزینەوەی چارەیەكی گونجاو و خێرا بۆ كێشەی كەمیی بەنزین و رێگریكردن لە بەرزبوونەوەی نرخەكەی، كۆبوونەوەیەكی هاوبەش لەسەر ئاستی باڵا ساز دەكەن.
 سەرچاوەیەك لە وەزارەتی سامانە سروشتییەكان راگەیاند، ئامادەكاری بۆ بەڕێوەچوونی كۆبوونەوەیەكی باڵا لە نێوان نووسینگەی سەرۆكی حكوومەت و لایەنە پێوەندیدارەكانی وەزارەتی سامانە سروشتییەكان دەكرێت، تا  لە زووترین كاتدا رێوشوێنی پێویست بۆ چارەكردنی كێشەی بەنزین بخرێتە واری جێبەجێكردنەوە.
بە گوێرەی زانیاریەکان، لەم كۆبوونەوەیەدا لێكۆڵینەوەی ورد لەسەر چەند پێشنیاز و تەوەرێكی سەرەكی دەكرێت، لەوانەش: زیادكردنی بڕی بەنزینی هاوردەكراوی رۆژانە بۆ ناوخۆی هەرێم و داڕشتنی میكانیزمێكی گونجاو كە دادپەروەری لە دابەشكردنی سووتەمەنیدا مسۆگەر بكات.
یەكێكی دیكە لە تەوەرە سەرەكییەكانی گفتوگۆكە، پێشنیازی دابەشكردنی بەشە بەنزینە لە رێگەی "كارتی ئەلیكترۆنی بەنزین"، بە مەبەستی رێگریكردن لە قۆرخكاری و دڵنیابوونەوە لەوەی كە سەرجەم شۆفێران بە یەكسانی سوودمەند دەبن.