بەرەی گەل بە توندی هاتە دەنگ

بەرەی گەل لەبارەی دادگاییکردنی لاهور شێخ جەنگی راگەیاندراوێکی بڵاو کردەوە و ئاماژەی بەوە داوە کە دواخستنی دانیشتنەکانی دادگا نیشانەی ئەوەیە لایەنی سکاڵاکار هیچ بەڵگەیەکی دیار و روونی نییە بۆ سەلماندنی ئەو تۆمەتانەی ئاراستەیان کراوە.
ئەمڕۆ چوارشەممە، 2/9/2026، بەرەی گەل راگەیاندراوێکی ئاراستەی رای گشتیی کوردستان و عێراق کرد، تێیدا هاتووە: "دوای تێپەڕبوونی زیاتر لە ساڵێک بەسەر رووداوەکانی 23ی ئاب و دەستگیرکردنی لاهور شێخ جەنگی و ژمارەیەک لە هەڤاڵانی، بڕیارە سبەی پێنجشەممە، ٣ی ئەیلوول، لە بەرامبەر دادگا ئامادە بكرێن."
ئەوەش خراوەتە روو: "چەندین جار دواخستنی دانیشتنەکانی دادگا نیشانەی ئەوەیە لایەنی سکاڵاکار هیچ بەڵگەیەکی دیار و روونی نییە بۆ ئەوەی تۆمەتە بێ بنەماکانی رووپۆش بکات."
جەختیش کراوەتەوە: "لێرەوە دەمانەوێ تەنها یەک بۆچوون ئاراستەی رای گشتی عێراق و کوردستان بکەین ئەویش بوونی سەبەخۆیی دادگایە."
بەرەی گەل جەختیشی کردووەتەوە: "ئەم کەیسە سەنگ و تاقیکردنەوەیەکە بۆ سەربەخۆیی دادگا و دادوەرەکان، تاوەکو دەربکەوێت ئایا دادگاکان گوێڕایەڵی ئاراستەکردنی حزبین یان سەربەخۆن و پابەندی قانون و سەرچاوەکانی دادوەرین."
هەروەها بەرەی گەل راشی گەیاندووە: "هیوادارین دادوەران لەم دۆسیەیەدا جۆرێک هەیبەت رێز بۆ دادگاکان و سەروەری یاسا بگێڕنەوە و نەوەک لەوە زیاتر  دادگا بێ بەها و بێ متمانە بکەن لای هاووڵاتیان."