بڕیاری نوێ لە بارەی بەنزین دەدرێت

بەڕێوەبەرایەتیی نەوت و کانزاکان بە هەماهەنگی لەگەڵ پارێزگاری هەولێر و کۆمەڵەی بەنزینخانەکان کۆبوونەوەیەکی بەپەلەیان ئەنجام دا، دوای ئەوەی دەرکەوت لە هەندێک جۆری سووتەمەنیدا قازانجی یەک لیتر گەیشتووەتە 300 بۆ 400 دینار، بە مەبەستی ڕێکخستنەوەی نرخەکان.
جەنگی مەجید، سەرۆکی کۆمەڵەی بەنزینخانەکان ڕایگەیاند کە سەرقاڵی دۆزینەوەی چارەسەرێکی گونجاون تا جیاوازیی گەورەی نێوان بۆرسە و بەنزینخانەکان نەمێنێت.
جەختیشی کردەوە، کە بەرزکردنەوەی کوالێتی و زیادکردنی ماددەی ئۆکتان نابێت ببێتە هۆی دروستبوونی بارگرانی لەسەر هاووڵاتییان.
لیژنەکانی پشکنین هۆشداری دەدەن کە هەر شوێنێک پابەندی نرخ و کوالێتی نەبێت، ڕاستەوخۆ دادەخرێت و بە 10 ملیۆن دینار غەرامە دەکرێت، هاوکات بڕیارە پێشنیازێکی نوێ بدرێتە پارێزگاری هەولێر و سامانە سروشتییەکان بۆ دیاریکردنی نرخێکی دادپەروەرانە بۆ بەنزین.