ئەمڕۆ پێنجشەممە 6ی تەمموزی 2023 سەرۆك مەسعود بارزانی لە سەلاحەددین پێشوازی لە مایك برایسۆن ریچاردسۆن، باڵیۆزی بەریتانیا لە عێراق كرد و پێکەوە پەیوەندییەكانی نێوان حكوومەتی هەرێم و حكوومەتی فیدڕاڵی عێراق و پێویستیی چارەسەركردنی كێشەكانی نێوانیان تاوتوێ کرد.
بە گوێرەی راگەیەندراوێکی بارەگای بارزانی، لە دیدارەكەدا كە خاتوو رۆزی كەیڤ، كونسوڵی بەریتانیا لە هەولێریش ئامادەی بوو، بارودۆخی سیاسیی عێراق و ناوچەكە و پەیوەندییەكانی نێوان حكوومەتی هەرێم و حكوومەتی فیدڕاڵی عێراق و پێویستیی چارەسەركردنی كێشەكانی نێوانیان و هەروەها هەڵبژاردنەكانی ئەنجوومەنی پارێزگاكانی عێراق تاوتوێ كرا.
ئاماژە بەوەشدراوە، لە بەشێكی دیکەی ئەو كۆبوونەوەیە بیروڕا لەبارەی بارودۆخی ناوخۆی كوردستان ئاڵوگۆڕ كرا و هەردوولا لەسەر ئەوە هاوڕا بوون كە بۆ پاراستنی شەرعیەت و بەهێزكردنی پڕۆسەی دیموكراسی، پێویستە هەڵبژاردنەكانی هەرێمی كوردستان بە بێ نانەوەی هیچ كۆسپ و تەگەرەیەك بەڕێوەبچن.
پەیوەندییەكانی نێوان هەرێمی كوردستان و بەریتانیا تەوەرێكی دیکەی ئەو دانیشتنە بوو.
هەروەها لەو دیدارەدا، باڵیۆزی بەریتانیا جەختی لە دۆستایەتی و هاوپەیمانی نێوان بەریتانیا و هەرێمی كوردستان كردەوە و سەرۆك بارزانیش وێڕای ئاماژەدان بە پەیوەندیی دێرینی نێوان گەلی كوردستان و بەریتانیا، خوازیاری قووڵتركردنی دۆستایەتی و پەیوەندیی نێوان هەردوولا بوو.
بارەگای بارزانی راشیگەیاند، مایك برایسۆن ریچاردسۆن باڵیۆزی بەریتانیا لە عێراق كە كۆتایی بە ئەرك و كارەكانی لە عێراق هاتووە، ماڵئاوایی لە سەرۆك بارزانی كرد و سەرۆك بارزانی سوپاسی هەوڵ و ماندووبوونەكانی باڵیۆزی بەریتانیای كرد و هیوای سەركەوتنیشی بۆ خواست لە ئەرك و كاری تازەیدا.
وەڵام بدەوه