ئەمشەو، 5ی 1ی 2025، كەناڵی (ئەلعەرەبییە) بڵاوی كردووەتەوە، سەرۆكی دەستەی ئەركانی سوپای ئیسرائیل، فرمانی بە سوپاكە كردووە لە دۆخی ئامادەباشیی چڕوپڕدا بن، بۆ هەر ئەگەرێكی هێرشی ئێران بۆ سەر وڵاتەكە.
هەریەك لە كەناڵە ئیسرائیلییەكانی (واللا) و (سرۆجیم)، بڵاویان كردووەتەوە، هێرزی هلێڤی، فەرمانی بە سوپای ئیسرائیل كردووە، بۆ هەر ئەگەرێكی هێرشی ئێران بۆ سەر وڵاتەكە ئامادەباش بن و ڕووبەڕووی هێرشەكان بنەوە.
پێگەی فارسیی (یۆرۆنیوز) بڵاوی كردووەتەوە، ئەو بڕیارانەی ئیسرائیل لە كاتێكدایە كە ڕاپۆرتەكان باس لە زیادبوونی ئاستەنگ و ئاڵنگارییەكانی ناوخۆی ڕژێمی ئێران دەكەن، بەتایبەت لەدوای ئەوەی هێزەكانی سەر بە ڕژێم لە ناوچەكەدا زیانی زۆریان بەركەوتووە، بە تایبەت لە لوبنان و سووریا.
باسی لەوەش كردووە، ئێران بەر لە هاتنەوەی ترەمپ، ئەگەری هەیە تووشی چەندین ئاستەنگی دابەزینی زیاتری نرخی دراوەكەی، قەیرانی ژێرخان لە كەرتی وزە و ناڕەزاییە كۆمەڵایەتییەكان ببێتەوە.
بەپێی سەرچاوە ئیسرائیلییەكان، سوپای پاسدارانی ئێران، بەمدواییانە هەوڵ دەدات دووبارە هێزەكانی سەر بە خۆی لە ناوچەكەدا ببووژێنێتەوە، ئەمەش جگە لە حزبوڵای لوبنانی.
ئامادەباشیی سوپای ئیسرائیل دوای ئەوە دێت، بەشێك لە بەرپرسانی ئێرانی دووبارە باسیان لە پێویستیی جێبەجێكردنی گەڕی سێیەمی هێرشەكانی ئێران بۆ سەر ئیسرائیل كردووەتەوە و ناویان لێناوە (بەڵێنی ڕاستگۆیانەی سێیەم).
وەڵام بدەوه