دەستبەجێ ئێران بەجێبهێلن

وەزارەتی دەرەوەی بەریتانیا لە ئاگادارییەکی فەرمیدا داوا لە هاووڵاتییانی وڵاتەکەی دەکات بە هیچ شێوەیەک گەشت بۆ ئێران نەکەن، هاوکات هۆشداریی بەپەلەش دەداتە ئەو بەریتانییانەی لەوێ نیشتەجێن یان بۆ سەردان لەوێن، کە پێویستە دەستبەجێ وڵاتەکە جێبهێڵن.
بەپێی بەیاننامە فەرمییەکەی وەزارەتەکە، ئەم بڕیارە دوای تێکچوونی دۆخی ئاسایش و بەرزبوونەوەی مەترسییەکان دێت، بە تایبەت بەهۆی ئەگەری بەرز و بەردەوامی دەستبەسەرکردن و زیندانیکردنی هاووڵاتییانی بیانی و خاوەن ڕەگەزنامەی دووانی بەبێ بوونی بەڵگەی یاسایی.
لەلایەکی دیکەوە، وەزارەتی دەرەوەی بەریتانیا ئاماژەی بەوە کردووە کە لە حاڵەتی ڕوودانی هەر قەیرانێکدا، بەهۆی ئاڵۆزییە دیپلۆماسییەکانەوە توانای پێشکەشکردنی هاوکاریی کونسوڵخانە بۆ هاووڵاتییانی لەناو ئێراندا زۆر سنووردار دەبێت. لە کۆتایی ڕاگەیەندراوەکەشدا جەخت کراوەتەوە کە ئەو کەسانەی ناتوانن دەستبەجێ بگەڕێنەوە، دەبێ بەتەواوی ئاگاداری شوێنی مانەوەیان بن و بە بەردەوامی پێداچوونەوە بە پلانە خۆپارێزییەکانیان و مانەوەیان لەو وڵاتەدا بکەن.