سوپای پاسداران لە گەرووی هورمز دا نەماوە

براد کوپەر، فەرماندەی فەرماندەیی ناوەندیی ئەمریکا (سێنتکۆم)، ئه‌مڕۆ هەینی رایگەیاند، هێزەکانی سوپای پاسدارانی ئێران لە گەروی هورمزدا نەماون و جەختی لەوەکردەوە، ئێران هەوڵ دەدات هەڕەشە لە کەشتیوانی لە گەروەکەدا بکات بەڵام کۆنتڕۆڵی ناکات
براد کوپەر لە گرتەیەکی ڤیدیۆییدا باسی له‌وه‌كردوه‌، فەرماندەیی ناوەندی ئەمریکا پابەندە بە پاراستنی ئازادی گەشتکردن لە گەروی هورمز، لە هاوینەوە هاوکاری نزیکەی یەک ملیار و نیو بەرمیل نەوت له‌ گه‌روه‌كه‌ تێپه‌ڕێنراوه‌.
ئاماژه‌ی به‌وه‌شكرد، فەرماندەیی ناوەندیی ئەمریکا ڕێگری لە ئێران کردوە بۆ هەناردەکردنی نەوت لە ئەنجامی ئەوەی بە "ئابڵۆقێکی بەهێز" به‌سه‌ردا سه‌پاندوه‌، جەختیشی کردەوە کە هەوڵەکانی سێنتکۆم بۆ دەستەبەرکردنی ئاسایشی ڕێڕەوی دەریای و بازرگانی نێودەوڵەتی لە ناوچەکە بەردەوام دەبێت.
ئەو لێدوانانە لە کاتێکدایە کە هەرەشەکان بەردەوامن بۆ سەر کەشتییە بازرگانییەکان لە گەروی هورمز کە یەکێکە لە گرنگترین ڕێگاکانی هەناردەکردنی نەوت لە جیهاندا.
ئێران ئەو کەشتیانە دەکاتە ئامانج کە بەوتەی خۆی ئەو سنوردارکردنانە پێشێل دەکەن کە لە لایەن تارانەوە سەپێنراوە، بۆ تێپەڕین بەو ڕێڕەوی ئاوی ستراتیجییە لە هەوڵێکدا بۆ ئەوەی کۆنترۆڵی خۆی بەسەر گەروەکەدا دوپاتبکاتەوە و فشار بخاتە سەر واشنتن.
لە سەرەتای سەرهەڵدانی جەنگەوە، ئێران هاتوچۆی کەشتیوانی لە گەروی ستراتیجی هورمز کە ڕێڕەوی نزیکەی یەک لەسەر پێنجی دابینکردنی نەوت و گازی شلکراوی جیهان بوە، پەکخستنی کردوە و دەستیکردوە بە هێرشکردنە سەر ئەو کەشتیانەی کە هەوڵی تێپەڕین دەدەن بەبێ مۆڵەتی خۆی
لەبەرامبەردا ئەمریکا بەردەوامە لە سەپاندنی گەمارۆی دەریایی بەسەر بەندەرەکانی ئێران بۆ گوشارخستنە سەر ئابوری ئێران.