ئای چەند دڵتەزێنە شارێک بە دەست کۆمەڵێک کەسى نابەرپرس تا بینە قاقای نقومی خۆڵ و خاشاک بێت و لەهەر چی جوانیە بخرێت و لەولاشەوە بکرێ بە مۆڵگەی تەراتێنی دەزگاکانی موخابەراتی بێگانەو هەرێمیەوە.
شارێک سەردەمانێک هێمای پێکەوەژیان و دارولمولکی بابانیەکان و چەقی چەکەرەی هزرو ناسیۆنالیزمی کوردی و مەڵبەندی پیاوەماقوڵان و بارەگای نوخبەی روناکبیران و حوجرەوتەکیەی پیاوانی ئایینی و شێخ و تەریقەتی ئایین و ئایینزاکان بێت، لەسەردەمی جیهانگەرایی و دیموکراسی و ئازادیدا لە هەرچی جوانیە بخرێت و لە قالب بدرێت.
ئەوانەی ئەمڕۆ بوونەتە دەمڕاست و کۆێخای سلێمانی و خۆیان بە خاوەن و موڵکداری ئەم شارەوە دەزانن، کۆمەڵە کەسانێکن سەرتاپای جەوهەری کەسایەتی مێژووی رابردوو و ئێستایان لە بێژینگ بدەی، نیو کیلۆ کەرامەت و پیاوەتی و سۆزو وەفاو ڕاستگۆییان لێ کۆناکەیتەوە و تەواو نامۆو بێگانەو رەزاقورس و بارگرانن بەسەر ئەم شارەوە.
ئەوانەی ئەمڕۆ خۆیان کردووە بە دەسەڵاتداری رەهاو خۆسەپێنی سلێمانیەوە، جگە لە کەسانێکی ناواخن بەتاڵ و فشۆڵ، هیچی تر نین. سەرتاپای دیرۆکی دوێنێ و ئەمڕۆیان بگوشی، یەک دڵۆپە ویژدان و دڵسۆزی و رەحم و بەزەییان لێ ناتکێ.
ئەمان گەر بۆیان بکرێ سلێمانی و دانیشتوانەکەی بە دەردی کەرکوک ئەبەن و شکۆوجوانی شار ئەکەن بە قوربانی مەیل و ئارەزو و چاوچنۆکیان و بەداخەوە لە گشت بەهایەکی جوان داماڵدراون و بەتاڵ بوونەتەوە.
فرە کوێخاکانی دەڤەری رەنگاورەنگ گەر بۆیان بچێتەسەر خاکی سلێمانی ئەکەن بە تورەگەوەو لە بازاری موزایەداتی چاوچنۆکی و تێرنەخۆریەوە بە نرخێکی هەرزان، وەک کەرکوکی قودسی کوردستان، ئەیفرۆشن و وەک هەمووجار وەک بەرزەکی بانان بۆی دەردەچن و دواجار خاکفرۆشیەکەیان بە دەسکەوت و سەروەری بە میللەتی داماوو بەشمەینەت دەفرۆشنەوە.
وەڵام بدەوه