ئەمە چ لۆژیک و عەقڵ و هەڵوێستێکی نائینسانی و نائەخلاقی و نانیشتیمانیە میلیشیاکانی عێراق دەستیان پێوەگرتووە بۆ لەباربردنی ئاسایشی هەرێمی کوردستان و ختوکەدانی هێزەکانی هاوپەیمان لە هەولێریان کردۆتە ئەرکێکی لە پێشینەی خۆیانەوە.
میلیشیا یاخیە تائیفیەکانی عێراق لە بری ئینتیماو خۆشەویستی بۆ عێراق، بوونەتە داردەست و کۆمەڵە هێزێکی لە یاساورێسا دەرچووی گێرەشێوێنی ئەوتۆ، جگە لە تێکدانی دۆخی ئەمنی هیچ بەرپرسیارەتی و ئەرکێک شک نابەن بیگرنە ئەستۆوە.
بەکارهێنانی میلیشیاکان لە لایەن ئێرانەوە بۆ یەکلایی کردنەوەی کێشەکانیان لەگەڵ ئەمریکا و گواستنەوەی ئاستی ململانێکان بۆ سەر خالی عێراق رووداوێکی تازە و دیاردەیەکی نامۆ نیە.
هەردوای رووخانی بەعس کۆماری ئیسلامی ئێران بە پێی سیاسەت و دارشتنی ستراتیژێکی وردی دوورمەوداوە کەوتۆ خۆی بۆ گواستنەوەی ململانێکان بۆ سور خاکی عێراق و خۆ بە دوور گرتنی لە تێوەگلان لە ئاکامەکانیەوە.
ئامانجی ئێران لە فشار هێنان بۆ سەر هێزەکانی ئەمریکا لە عێراق نە لە خەمخۆری و دڵسۆزیەوە بۆ گەلانی عێراق سەرچاوەی گرتووە و نە ململانێیەکی ڕاستەقینەیە.
ئامانجی کۆماری ئیسلامی ئێران دەست خستنی کۆمەڵێک دەسکەوتی سەربازی، ستراتیژی و مادیە لە چوارچێوەی ستراتیژێکی درێژخایەنی هەرێمایەتیدا. ئەو لایەنەیشی لەم گێرەشێوێنیەدا باجێکی قورسی داوەو دەیدات، گەلانی عێراقن بە هەرێمی کوردستانیشەوە. ئەگینا بە درێژایی 44 ساڵی تەمەنی کۆماری ئیسلامیەوە هەرگیز ئێران و ئەمریکا ڕاستەوخۆ رووبەرووی یەکتر نەبوونەتەوەو جەنگ و ملانێی نێوانیان زیاتر لە جەنگی مشک وپشیلە دەچێ تاململانێیەکی ڕاستەقینەو حەقیقی.
وەڵام بدەوه